迪士尼還未開幕，有四位年輕人已經投入自己幻想的迪士尼世界，打造出一首《他約我去迪士尼》喺網上流傳，感受夢幻一般的出頭天。由小撮人分享，到成為香港雅虎搜尋人氣金榜第一位，令四位創作人初嘗成名感覺，可惜專業人士並唔睇好！
記者：馬慶武、余敏
攝影：楊錦文
攀上人氣搜尋No.1
5月初，香港雅虎熱門搜尋榜頭三甲開始出現《他約我去迪士尼》歌名，雖然只排第3位，但已成為網上討論區熱話。到咗本周，呢首歌更登上人氣搜尋榜第一位。作曲兼主唱KellyJackie話，早前考完會考最後一科嗰日收到朋友電話，話喺Yahoo!熱門搜尋見到佢首歌個名，佢即時開心到周圍打電話通知所有Royals成員。
免費下載網址：www.cmidi.com或forum.i010.com
Jackie愛Kelly
「我兩歲已經接觸卡拉OK，4歲學琴，16歲就嘗試作曲喇！」Jackie最愛Kelly（陳慧琳），所以𠵱家的藝名叫做「KellyJackie」。年前喺音樂網www.cmidi.com識到一班志同道合年輕人，繼而組成音樂創作單位Royals。Jackie話鍾意開心感覺，一邊作呢首歌的時候，就已經諗到主題──一個喺迪士尼發生的愛情故事，「香港迪士尼開幕係全港人期待的事，感覺好開心，而且迪士尼感覺夢幻、浪漫，裏面的公主王子童話式愛情，更加係每個少女都嚮往的，包括我！」靈感一到，Jackie只用咗一日時間起貨，完成鋼琴版諗埋歌名再交畀海藍、阿庭作詞，最後由林柿編曲，今年一月正式擺上網任人聽。
乘勢年尾出碟
「做咗創作歌曲擺上網呢件事一年幾，不斷創作、完成、放上網，《他約我去迪士尼》已經係我哋第二十幾首『上網』作品，冇諗過會突然Hit起。」面對突如其來的竄紅，編曲的林柿特別興奮：「老土啲講句，多人搵多人聽有被肯定感覺，之後創作會更有信心。」除咗自信，Jackie已經簽咗經理人，準備作更大發展。而Royals亦同不同唱片公司傾緊，就算冇人支持都會喺年尾自資推出大碟，似乎呢幾位年輕人已經明白到，難得機會來到不能錯過。
Royals創作班底
《蘋果》幫《他》派上台
MusicPlus製作部監製關禮琛：唔算突出！
「冇出現甩音，唱、作都幾好，技巧較幼嫩有待磨練，不過可能咁先唱到清純的感覺出嚟。旋律較平淡簡單，如果係如常由現役歌手演繹，如常派台發表，可能唔會咁受歡迎。如果佢哋送呢隻歌嚟我哋唱片公司自薦，都好難突圍而出。」
資深音樂人伍樂城：非常大路！
「之前未聽過，首歌個歌名配合番內容，旋律、主唱者同和絃的運用演繹水準一定合格，又易上口，有齊流行曲元素，作曲者幾有潛質。不過我就覺得略為大路、K歌咗啲！」
商台吒咤903DJ卓韻芝：呢首係「水貨歌」！
「我早前喺討論區搵到呢隻歌，跟住喺自己個節目度播過！呢首歌的感覺好有水貨Feel，即係要捐窿捐罅先搵到嚟聽，又識食正迪士尼個潮流。不過如過正常派上台，應該唔會太Hit！」
獨家專訪：躲在《老鼠》後的楊臣剛
連Twins都翻唱的《老鼠愛大米》，同樣是突然爆出來的大陸網絡音樂神話，以最高點擊率獲得全球最大中文搜索引擎「百度」04年MP3全年冠軍歌，其作曲作詞人正是在大陸紅到爆燈的楊臣剛。「這首歌本來叫《這樣愛你》，後來改名《老鼠愛大米》，是因為老鼠愛大米是一種本能，沒想到現在竟成為一個熱門論題，因為大家都說，現在的社會老鼠不只愛大米，還會挑吃更貴的紅米、泰國米之類。」
忙到爆紅到紫的楊臣剛現在已經沒時間上網，不過他千叮萬囑記者要寫上這一句：他的音樂啟蒙者是Beyond的家駒，「沒有家駒那種打不死的音樂精神，就沒有今天的我。我為世榮創作了一首《愛情從頭來》，今秋會在香港推出。」
網上再掀神話：7億點擊香香
網絡音樂似乎已經成為新一代聽歌的不二之選，大陸最新爆出的網上歌手香香，根據所在網站163888.net提供的資料，其點擊率超越7億，唱片公司立即幫佢出唱片，似乎今時今日網絡音樂已成新歌手的前哨戰場。
網上音樂蒲竇
Royals推介
常用軟件：
Cakewalk同Sonar
常蒲音竇：
www.greencoffee.com.hk
Mac友之選
常用軟件：
GarageBand
常蒲音竇：
www.15megsoffame.com
大陸紅爆
常用軟件：
Coolpro2
常蒲音竇：
www.163888.net
