謝鴻興醫生來電郵講：「以免被人誤會，以為本人是以一個人的賺錢能力來評價個人之品格之徒，與先生屬同一水平，恐怕會有辱先生之高尚情操。」一腳踩落嚟，踩得幾大力㖭，當然要回應。
左丁山在此欄經常講唔少賓架、專業人士、商家之賺錢能力，但絕少講及人哋嘅品格，原因好簡單，批評別人之品格，好容易招惹官非，報館唔會鼓勵；懂得些少邏輯之人，都知道個人賺錢能力，與個人品格全無關係，兩者不可掛鈎。賺錢能力高之人，品格可以好高，可以普普通通，亦可以好壞，總之不可一概而論；同樣理由，不善「搶錢」（謝醫生語）之人，品格可以好高尚，亦可以壞到透。
本欄多講中環事，而中環並唔係吟詩作對、談文說藝嘅地方（說藝都係講吓趙無極之名作竟然可以賣到一千八百萬；佳士得、蘇富比下季會有乜嘢古董名畫推出拍賣），而係國際金融中心，多講IPO，神華、交通銀行上市值唔值得申請。故此有啲讀者見左丁山多講賺錢之人、賺錢之事，或會誤會賺錢乃係左丁山評價別人之唯一標準，咁就simpleandnaive矣。
一個人賺唔賺到錢，容易睇得到，一個人之品格德行，好難了解喎，要同佢相識多年，做過好朋友先至會充份了解。《壹週刊》創刊之前，辦過一個宣傳遊戲，競猜誰是岳不羣，頗收宣傳之效。呢個社會有唔少岳不羣，只從表面言行觀之，滿口仁義道德，道貌岸然，反對賭波賭馬、反對同性戀之人，你估佢一定品格高尚？點知佢唔係岳不羣呀？
此外，古有明訓，王莽野心未露之前，聲譽不知幾好，西元四年甲子年，漢太保王舜及官民上書頌王莽功德者八千餘人，到咗西元九年，王莽廢漢帝，自稱新皇，天下方知其狼子野心真面目。從表面事迹評價別人之品格德行困難之至。