呢排大部份人都將注意力放在新股，大市相當靜，尤其係二三線股就更加靜到暈，小初好多經紀朋友悶到周圍打電話打牙骹。
大型新股神華（1088）全城大孖沙都話要貨，但據講其他芬佬及普通投資者興趣唔大，認購未見踴躍，即將招股的中遠控股，聽講反應亦係麻麻，莫非人人都將目光放在交通銀行？
另外，早幾個月前話收購大陸電影製作同旅遊電視頻道的友利控股（419），終於日前在股東會上通過收購協議。友利業務將由電子生意轉型至電影電視，但據講目標不止於此，公司諗住全面轉型至大陸傳媒股，所以唔排除陸續有收購行動。
友利自從公布轉型，股價好快就脫離仙班，兼且成功以0.12元批股集資。雖然呢排市況麻麻，但隻股仍然企硬在0.14元樓上，接貨的芬佬，帳面仍然賺緊錢，家陣似乎係等緊下一浪到來。友利昨日微跌0.13％，收0.146元，成交金額699萬元。
慕容小初