幾十年舊樓，月租六萬幾，原來一樣可以唔憂租。
喺一九四五年前落成嘅東半山宏豐台4號二樓，面積三千四百呎，屋之島歐志康話，剛以每月六萬四租出，每呎十八個八，重唔包每季四五千蚊嘅差餉。單位嘅天台同花園，就由業主租客共用。
呢幢戰前舊樓，高三層，業主係一個低調家族，佔用地下同一樓，二樓新近放租，有唔少客睇過，但業主對一個法國家庭特別有好感，指示代理同佢詳細傾談。
咁啱呢個客，為咗方便仔女入讀法國國際學校，要從淺水灣搬嚟呢區，覺得單位有法國住宅feel，所以最後都肯畀到業主一直堅持嘅租金承租，結束長達三個月嘅睇樓活動。
淺水灣道117回報普通
淺水灣道一一七號GrosvenorPlace，日前錄得三宗散業主出租個案，月租十一萬至十二萬，回報率約三厘。
大業主放租嘅二十二樓，二千八百呎，叫租十四萬，每呎五十，若以物業放售價兩萬蚊呎起計，租金回報約三厘。
喺息口趨升嘅環境下，三厘回報率似乎唔算好吸引。不過，代理第一太平戴維斯方文彬話，隔籬招緊標嘅淺水灣道一一五號，意向呎價萬五，估計將來每呎要賣兩萬五至三萬，相比之下，GrosvenorPlace肯定有好大升值潛力。
世紀21一日開五分行
用特許經營權形式經營嘅世紀廿一，旗下最多加盟分行嘅世紀廿一奇豐，近排積極擴充，噚日就一口氣連開五間分行，主要喺馬鐵沿線同埋西貢區。
之所以揀馬鐵沿線，係因為發現馬鐵通車後，大圍、沙田以至馬鞍山屋苑，成交倍增，雖然上個月加息影響後市，但認為有前景，所以開多幾間。佢哋喺西貢匡湖居已有分行，今次擴展到清水灣一帶。
另外，啱啱頂租咗清水灣銀線灣廣場八樓，前身係捷利物業顧問行行政總裁羅林渭租用嘅舖位，估計下個禮拜可以開始營業。
種植道1號起烽煙
會德豐地產山頂種植道1號豪宅盤，下個禮拜正式發售，兩大代理行已經先後展開密集式宣傳攻勢，未正式開戰，已經聞到陣陣火藥味。
發展商重惟恐天下不亂，增設獎金制，鼓勵代理鬥個你死我活。只要喺兩個月之內，促成最多買賣，而成交宗數又超過十二個嘅話，就可額外獲發一百萬獎金。
難度都幾高，不過，就算攞唔到獎金，促成一個單位，都有樓價百分之一點五作佣金，比一般大碼豪宅高，以每個單位平均賣五千萬計，做成一單交易，就有七十五萬佣，相當吸引。
代理話，山頂南區近排較高佣金嘅新盤，非淺水灣道五十六號莫屬，有兩巴仙，每單成交佣金至少過百萬，代理幫手賣樓，自然更有動力。
超豪宅放盤燈柱貼招紙
尖沙嘴凱旋門頂層複式，錄得呎價逾三萬嘅天價成交，發展商新地，經已套現逾百億，二手轉賣獲利個案都唔少。下個禮拜五，有兩個凱旋門單位拍賣，話晒呢個都係叫做豪宅盤，但諗都諗唔到，蘭西喺街邊啲街招睇到有關消息。
蘭西噚日喺中環做採訪，見到貼喺街邊交通燈柱嘅，竟然係凱旋門拍賣單張，兩個都係映月閣高層，各一千三百二十六呎，估計夾埋都值三千萬以上。
幾千萬嘅貨，原來都係靠街邊一張招紙嚟搵客買，想唔信香港地多有錢佬都唔得。想買豪宅，第日可能要留意多啲街邊嘅招紙至得。
電郵地址：[email protected]
