美林突然出報告，預期按揭利率可能上調2-2.5%，樓市1年內跌20-25%，叫客沽新地（016）及信置（083），新地被嚇至腳軟，跌1.33%，信置則因為下周一重新成為恒指成份股而獲得支持，升0.63%至7.95元。
講到利率問題，美國開始放聲氣話利率就快見頂，甚至可能已經加多咗，要減番啲都唔定。其實就算按揭利率再升2-2.25%，不過係5-6%左右，較一般銀行給予員工的優惠按揭利率4%高1-2%，比起以往按揭利率閒閒地8-12%水平仍差好遠。
阿虎估計樓按利率上升有限，唔會對樓市有太大拖累，其實只要香港經濟向好，投資信心增加，失業率持續下降，冇人被迫要蝕本沽樓，則空置率高企亦非大問題。
勵晶（575）原本計劃出售南韓附屬Bridge證券套現後，可以向股東派發特別股息，但人算不如天算，交易不獲監管當局批出，再加上Bridge核數報告出問題，南韓的上市地位有機會被撤銷，搞到勵晶一鑊泡，股份復牌大跌近30%至0.248元，今次唔知勵晶點收科？
恒中私有不易成功
恒中（246）股價繼續炒上，升1.3%，收7.80元，較私有化作價7.50元高出4%。黑客話，市傳今次唔係炒恒地（012）調高收購價，而係炒恒中私有化失敗。過往有唔少私有化失敗的個案，當宣布失敗後，股價確有短暫震盪，但最終多會高於收購價。
恒中成為私有化對象，是因為資產淨值遠高於私有化作價，如果大股東想私有化，小股東又不願割愛，其實反映恒中貨源已歸邊。恒中炒得愈高，私有化失敗的機會就愈大。
阿虎