下周五舉行的《感受 鄧麗君音樂舞台劇2005》，曹眾與石修等飾演鄧麗君的歌迷，以感性及客觀的角度帶出一個立體的鄧麗君，舞台劇還會搭建天安門景，以達成鄧麗君生前欲在北京天安門開演唱會的心願。
紀念鄧麗君逝世十周年的《感受 鄧麗君音樂舞台劇2005》將於下周五開始一連三日在文化中心大劇院舉行，六位藝人將扮演鄧麗君歌迷，其中包括飾演導遊的曹眾、導演石修、鄧麗君管家肥媽瑪麗亞、歌唱老師方伊琪、音樂前輩JoeJunior以及年輕音樂人藍奕邦等，會透過不同角色，表達對鄧麗君的各種感受。
俾肥媽搞濕
曹眾昨日接受本報電話訪問時說：「其實我哋六個某程度上係做番自己，音樂劇以鄧麗君已經過身嘅角度去做，我做嘅導遊角色，十年嚟周圍帶人去紀念鄧麗君，仍然有好多人記得佢，今次嘅劇本搞咗半年，完全係香港原創，希望大家可以以感性同客觀兩方面去feel吓鄧麗君，從而帶出一個立體嘅鄧麗君，肥媽做嘅管家真係好感性，我一聽佢唱歌就眼濕濕，而修哥係一個導演，專程由外國返嚟香港排呢個劇，可以話係戲中戲。」
鄧麗君生前未完的心願，就是希望去北京天安門開演唱會，該劇會替她完成心願，曹眾說：「我哋班歌迷送畀佢嘅禮物，就係去天安門開演唱會，到時會喺舞台上面搭個天安門景。」
「用心唱歌」
曹眾續說：「我好遺憾喺鄧麗君生前未有機會見過佢一面，但我覺得自己同佢都好有緣，佢嘅歌𠵱家聽番都好感動，因為佢真係用心去唱，希望呢個劇可以表達到鄧麗君嘅真善美。」
