曾喺韓劇《天國的階梯》入面扮演奸角友莉嘅金泰喜，近期喺當地人氣狂飆，最近佢喺韓國一個選舉入面，獲選為男性心目中「最自然美人」冠軍，而文根英就成為女性心目中「最自然美人」第一位。
韓國一個電訊公司網站最近搞咗「最自然美人」選舉，以金泰喜同文根英嘅競爭最激烈，最後金泰喜以百分之三十三嘅票數，成為男性心目中嘅「最自然美人」冠軍，而文根英以百分之二十四嘅票數屈居亞軍。不過，換轉以女性為對象，文根英以百分之二十五嘅票數成為「最自然美人」冠軍，而金泰喜只係排第三。
韓佳茵成黑馬
至於宋慧喬同全智賢等比較多香港人熟悉嘅靚女，得票率竟然非常低，喺男、女方面都三甲不入。令人比較意外嘅結果係韓國男星延政勛嘅妻子韓佳茵，佢喺男士心目中排第三位，女性心目中排第二位，非常厲害。
俊哥皮膚至靚
此外，裴勇俊最近喺另一個韓國網站搞嘅選舉入面，獲韓國三十一至三十九歲嘅男士選為最憧憬嘅皮膚靚男，個選舉重按年齡層分為唔同嘅類別，Rain同姜東元就同時獲選為二十一至二十九歲男人最憧憬嘅皮膚靚男。