吳孟達最近同黃聖依、元華同元秋等喺橫店拍攝內地劇集《功夫狀元》，身為周星馳契仔嘅達哥日前接受內地記者訪問時，好坦白咁話星爺嘅人際關係唔好，搞到佢成日要幫星爺補鑊。
達哥話同星爺識咗二十幾年，所以好了解佢，達哥話八○年識星爺，之後合作拍《他來自江湖》時成為好友，達哥話：「這幾年，有關星爺的負面新聞愈來愈多，大家都說他性格古怪，不易相處，這些話都不是沒有道理。實際上，星爺對自己要求太高，遇到演員吃多次NG，他就會罵人。」
發哥訓誨
達哥話可能佢係唯一一個冇俾星爺鬧過嘅演員，佢話：「我經常幫星爺去協調、平衡各種人情，換句話說，我要幫他搞好人際關係。」
達哥又話曾經沉迷賭博，搞到負債纍纍，又諗過轉行。喺萬念俱灰嘅時候，佢諗住搵周潤發幫手，點知發哥拒絕佢，當時發哥話：「如果我幫你，實際是害了你，因為你既不會戒賭，也不會真正站起來。」好彩達哥最後大徹大悟企番起身，咁大家先至睇到佢嘅演出咋。
林熙蕾九萬元買兩個袋
林熙蕾接拍纖體廣告後賺個荷包腫脹，日前佢出席康城影展時，就趁機買咗兩個名牌手袋，總共花咗成九萬幾港紙。問林熙蕾平時賺埋啲錢點使，佢話：「我沒有投資概念，通常都把錢存在銀行，請理財顧問幫我買一些外幣。」
李亞鵬快閃避談王菲
王菲男友李亞鵬前晚同蕭正楠等藝人，喺北京出席一個名為「愛浪之夜」嘅中國國際廣告模特兒大賽記者會。李亞鵬一出現，即刻成為全場焦點，成班記者係咁追訪佢。對於同王菲嘅戀情，李亞鵬當然例牌唔答啦！唔知係咪俾記者問到唔耐煩，李亞鵬竟然喺記者會開始前已離開，前前後後只逗留咗幾分鐘咋！
佘詩曼補拍有陰影
佘詩曼日前拍無綫劇集《火舞黃沙》時仆損個嘴，噚日佢接受商台電話訪問時話：「我好番好多啦，我當時係牙撼落地下，但就冇崩牙。」阿佘話今日會去馬來西亞做嘢，返港之後就會補拍番嗰幕戲，佢話：「諗番起個情景都好驚，有好大陰影。」
徐小明重出江湖獻唱
有線電視節目部執行董事徐小明將擔任下星期二「香港各界紀念抗日戰爭勝利60周年大型晚會」嘅表演嘉賓，獻唱《霍元甲》同《陳真》，呢兩首係徐小明嘅首本名曲。徐小明已經封咪十幾年，今次佢應承復出，所以特別抽時間練歌，不容有失嘛！
張佩金返港整假牙
張佩金日前喺馬尼拉暈倒，好彩冇乜大礙，噚日佢同男友Harry飛返香港，張佩金話一定要去睇牙醫，佢話：「上年撞車後冇咗隻門牙，雖然有配隻假嘅，但成日食食吓嘢都跌落嚟，所以一定會搵牙醫整好啲。」佢重話身上有好多手術後嘅疤痕，所以將來一定會做整容手術整走佢。
