煲呔曾養精蓄銳咗剛好一個星期，終於等到今日可以大顯身手，如無意外，北京今日會正式批准佢老哥辭職，咁煲呔就可以堂堂正正宣布參選。
八方聽聞，煲呔嘅大擁躉李國寶今日會企出嚟以競選辦主任嘅身份亮相，寶哥哥身經百戰，見傳媒簡直係易事。
至於大軍師許仕仁雖然唔見影，但係佢真係好勤力為煲呔打點一切，心水清嘅人都睇到，今次幫煲呔參選嘅好多都係老許嘅舊部或者老友，佢老哥以前係積金局嘅行政總監，咁同佢共事過嘅人都走晒出嚟，好似李業廣同寶哥哥都係當年積金局董事局嘅主席同成員（李生今仍係主席），攞命陳（陳德霖）嘅太太唐芷青𠵱家係積金局嘅阿頭，你話係咪全局總動員？許仕仁人脈之廣，盡見一斑。
所以話，從前做過許仕仁手下都會有運行，最近接霍文做運輸署署長嘅黃志光亦係老許嘅忠實擁躉。
傳真︰2623-9278
電郵︰[email protected]