明明問過二姐弄牛肉球的秘訣，「想黏可以加隻蛋，或者加粟粉，視乎你想硬些還是軟些。」我想好似酒樓的山竹牛肉咁，「那種膠狀是靠把牛肉不停『撻』出來的。」吓？咁煩！
又是半夜2點，我叫媽媽為我預備大半碗牛肉，她卻醒目地替我加了豉油、糖、粟粉和麻油醃，我加入了冬菇粒和一隻蛋一同攪勻，攪來攪去，咦，糊仔咁，點撻呀？想搓成球狀更加困難，一放上手，牛肉就從透明手套的指罅間漏出來，怎辦？咁夜，又不能打電話給二姐求救……有計！
我把一個薯仔切開三四份，放在熱水煲腍，去皮，再放進牛肉中搓呀搓，攪呀攪，攪到爛茸茸，終於有點黏黏的感覺了，便揑成球狀，放在熱油內煎至兩面微黃，加少許水焗三分鐘，搞掂。諗諗吓，不如配粒青豆啦，會好看點，但放在白飯上仍覺單調，於是我又加上切條紫菜，縱橫交錯地在白飯上打格，賣相幾特別吖！不過，味道就跟我心目中的「山竹牛肉」相距十萬八千里……
「我叫你加蛋啫，都要視乎你的牛肉有多少，全隻放上去那大半碗牛肉內，當然稀漏漏啦！」又唔早講！本想向二姐發難或待她稱讚，點知卻換來嘲笑！（八）
老四小吉