最近有英國傳媒公布一個國內富豪榜，共一千名上榜者當中，有四十一位富豪都係球圈中人，其中又以「車仔」班主阿巴莫域治最有錢；僅次於「油王」嘅球圈人士，竟然唔係曼聯或者阿仙奴嘅人，而係熱刺股東劉易斯，身家高達二十億英鎊（約二百八十億港元）！
其實可能有好多球迷都已經感覺到，熱刺嘅有錢程度不下於幾間英超大會；最主要原因梗係佢哋成日都用高價入錯貨啦，好似逾八百萬鎊嘅李察士、逾千萬鎊嘅列保夫等等。
不過呢啲都係過去咗嘅事，自從佢哋上年搵嚟曾幫燕豪芬發掘出朗拿度、史譚、雲尼斯達羅等球星嘅丹麥人晏尼臣，負責球員買賣事宜之後，已經無咁亂開水喉，最貴嘅收購都係四百七十萬鎊嘅愛爾蘭國腳安迪列特；賣走前鋒普斯迪加收番五百萬鎊，加上放走高達三萬鎊以上周薪嘅美國門將基拿，成季其實唔係使咗好多錢。如果唔係，家陣破咗產都似！
托迪簽羅馬賣身契條件優厚算執到
托迪終同羅馬簽賣身契，以約二十一萬歐元周薪，加埋退休後做高層嘅優厚條件續約到一○年，基本上踢到退休。回想托迪舊年喺歐國盃「放飛劍」後冇運行，之前想斟佢嘅球會統統打退堂鼓，令佢出國夢難圓，家陣母會財政麻麻都肯畀咁好條件，「王子」都算賺咗囉。
拜仁「孖寶」真識做要列文出醜幫簡尼？
拜仁前晚大數德國四比二，拜仁上半場最搶鏡球員肯定係一對德國國腳戴斯拿同舒韋恩史汀加，戴斯拿先開紀錄，後者就搞到侯夫擺老烏；陰謀論睇，上半場負責把關嘅係列文，列文又同拜仁老大哥簡尼爭緊德國一號門神，拜仁孖寶會唔會份外落力，為咗令列文出醜呢？
米堡「高揸低沽」賣馬卡朗尼蝕大本
講開入錯貨嘅英格蘭球會，又令我求大俠諗起米杜士堡，當日以破球會紀錄轉會費嘅八百一十五萬鎊（約一億二千萬港元），買入意大利年輕前鋒馬卡朗尼。最近終於有意甲球會錫耶納向「米堡」開價，想買入呢個鄉里，不過價錢只係二百萬鎊，都可謂名副其實蝕本貨囉。
逢周一至周五見報