以男仔咁粗獷豪邁、不拘小節嘅性格，一旦擁有自己房間，大抵必定是七國咁亂無疑？但今次被訪的兩位大男孩卻可為天下男生大平反，當隔籬版女仔以花巧玲瓏搶眼悅目博盡焦點之時，男界代表卻來個360。變調，玩簡約、Sell寧靜舒適。
記者：梁彩燕 攝影：何家亮、陳盛臣
鳴謝：www.spacedesignhk.com
少男部屋
100%親手製作 大自然氣息
面積：150呎
踏入房，一股大自然清新氣息突然襲來，一室由木色組成，當眼處放有盆景植物，刻意鋪砌的石卵路很有熱帶Feel，也為房間增添了不少夏日感覺。屋主Teddy有這樣的構思，全因一次到沙巴旅行留下深刻印象，因此睡房亦仿照東南亞式設計，如今日日放工就好似去咗度假咁！而且全房設計、裝修以至床架、牆身及99%家具，都由屋主TeddyDIY而成，可真令人佩服！
一星期自砌床架
入到房，眼睛焦點不期然放到房內突出的白牆上，微微凸起的看似規則又有點無意的圖案，原來都不是Teddy的原意，「呢幅牆係自己買石膏粉溝水『閩』成的，原來只想做一幅普通白牆，但始終第一次親手做，預算不到牆身乾透的時間，誰知最早做的一邊已乾透，另一邊卻未完成，眼見效果不佳，後來便索性用手胡亂髹點圖案出來！」現在兩邊Pattern雖有點不對稱，但效果還是令人滿意的！
而床架由買木、度位到裝嵌共花了一星期完工，Teddy考慮到為了增加儲物空間，特意升高約呎半，底部設置兩層儲物格，而台階更可充當長椅招呼親友，可謂一物二用，挺有心思。
小記有Say
對於一個無讀過木工裝修的人可以自己砌出一間房這回事，不得不誇獎一下。由一間空白的爛地由零開始，變成住得人不特止重勁有ResortFeel似模似樣那種的「製成品」，實要畀個叻佢！
暖啡色 拼出日和格調
面積：120呎
設計師Hugo全屋以白色為主調，房間大部份牆身卻髹上深啡色，以為感覺會很怪很深沉，但效果卻是意外的暖。因為想房內感覺舒服點、Warm點，燈光都調得偏暗，以營造舒適感，加上淺木色的家具，能巧妙的與啡色撞出對比。問到為何偏要選深沉的啡色？Hugo更笑言是因為喜歡吃朱古力！難怪層架都放有M&M朱古力公仔！但為何房間面積細小卻髹得一牆啡？「人哋常說白色可製造多點空間感，事實都係，但我認為始終房間面積太小，即使髹得全房白色也無太大幫助，倒不如索性做得有性格點好了。」擁有細小房間的不妨可參考一下Hugo的做法。
而另一邊長形休息的區域只有50來呎，風格帶點和式格調，一來因為採地台設計，二來則放有榻榻米、日式座枱燈等小擺設，襯托出點點日和味兒。房的另一端則較為實用性、機能性，因為愛看書，房內竟然特製了兩三個大型書架，還有超高身的格子儲物空間，實用之餘也不失風格。
小記有Say
本身已為設計師的屋主咁專業，我都實在冇乜話好說。但好欣賞佢話既然空間點整都唔會大，即使髹白牆都無濟於事，倒不如索性大膽創造一下自我風格好過，住喺豆腐膶咁細地方的你我，不妨諗諗搞吓新意思！