麥嘜、麥兜係少有長賣長有、新貨陸續出、Fans繼續掃嘅本地創作。由聽日開始一連三日，麥嘜、麥兜重會俾人賣豬仔，由春田花花幼稚園去到香港展覽中心，開倉益豬迷。貨種多、新貨舊貨都照減，最平減到兩折，平到你估唔到！
記者：馬慶武
攝影：何家亮
Model：Bonny（Salvador）
首搶毛毛公仔
永遠最多人買一定係毛公仔，造型可愛又可以攬住瞓覺。掃貨貼士係先買10吋中型公仔，尤其畢業款最少貨；最後買大嘅，因為現場可預訂。
家品都有得掃
麥嘜麥兜的拖鞋、衣架等實用家品，亦是今次開倉Items。另外床單更係熱賣貨，雙人床單因為包括兩個枕頭袋，最受歡迎最快賣晒！
店員推介：
怕羞店員阿琳同黃小姐話相簿係熱賣貨：「大嘅賣$35，細嘅賣$28，咁平一定多人掃。而且相簿實用性高，可以話係用足一世，超抵！」
其他筍貨
街頭即Check玩估價
麥嘜產品本身定價唔係高，𠵱家開倉就更加抵買。街頭訪問揀出心頭好即時估價，點知個個都估貴咗，咁即係大家都覺得抵喎！
最後一日冇減價！
𠵱家好多精明消費者都會等開倉最後一日最後階段先去，希望掃到減上減嘅筍貨。呢招喺今次嘉年華就行唔通喇，因為據負責人講，最後階段都唔會有貨再減，所以豬迷都係叠埋心水第一日去掃貨好過。重有，記得早啲去，年年開場前兩粒鐘就有人龍㗎喇！
麥嘜特賣嘉年華
日期：2005年6月3日至5日
時間：12:30pm至7:00pm（6月5日至6:00pm）
查詢：29549593
地點：香港展覽中心：灣仔港灣道26號華潤大廈低座4樓401室（春田花花幼稚園將於麥嘜特賣期間暫停營業3天）