大市反覆中仍以正數埋單，恒指進帳6點，靠嘅係中移動（941）與和黃（013），兩隻重磅股總共帶起恒指36點。
每日總有好幾隻窩輪特別出色，但要喺幾十點波動中成功搵食，運氣可能較眼光更加重要。普羅炒家始終唔知芬佬幾時掟啲錢落中移動，然後又掟落和黃。呢啲大藍籌嘅基本條件，唔會一日之間變得好好多或衰好多。
恒指P輪3943：恒指雖有升幅，但收市時期指有近40點跌幅（正式收市期指跌51點），恒指C輪偏軟，P輪偏硬，恒指C輪跌得最多嘅係3744，冇咗28%，下月尾夠鐘，溢價逾7%，又係仙輪，縮溢價縮到揸家呱呱叫。P輪熱門貨色係3605，有進帳10%，留意時日無多，月尾夠鐘。
恒指逼近萬四，尚差127點，買落贏面大過買上，最好大市再谷多一谷，輪價跌多一跌，買恒指P輪，對象係3943，9月尾夠鐘，輪價15.1仙，溢價2.1%，槓桿率15.1倍（有效9.7倍），引伸波幅17.8%，數據好靚。
和黃P輪3745：和黃升1.25元，若再升，博佢回吐，細注買P輪3745，下月上旬到期，輪價24仙，溢價20%，槓桿率28.8倍（有效15.8倍），引伸波幅21.6%。和黃P輪中，3745交投最勁。
章盛