政黨、政團趕住去支持曾蔭權參加行政長官補選,挺曾聲音沸沸揚揚。出名敢言嘅中原集團主席施永青,雖然近排忙於籌備辦報,對於特首競選熱門話題,卻別有一番意見。
佢認為,準備競選做特首嘅候選人,都未有乜嘢政綱出台,大大聲爭住挺曾嘅人,究竟憑甚麼去挺呢?平時都鍾意評論時事嘅老施,認為政治人物對自己要有政治理念,選民都未清楚政治方向,趕住出嚟挺曾,係一種不負責任嘅行為。
大發一場政治偉論後,不忘講番生意。施老闆話,搞緊嘅報紙,會走大眾化綜合路線,佢話,之所以辦報,唔係為政治利益,主要動力係睇到有商機。
坦白講,過去冇辦報經驗嘅施永青,都話今次係破釜沉舟,但當然認為有贏面,先至會去嘗試。雖然自己係地產代理行老闆,但唔會刻意避開監察地產商嘅新聞報道,叫大家放心。
搞投資移民買蔚藍
曾幾何時,受到市場高度期許嘅投資移民計劃,隨住樓市勁升,人人炒樓,已經好似冇咩叫座力,不過,原來香港仍然有吸引力,啱啱有個印尼華僑,用咗千三萬買樓,諗住申請投資移民,而物業就係將軍澳蔚藍灣畔。
各位讀者冇睇錯,將軍澳樓半山豪宅價,竟然真係有二手承接力。
美記黃少明報料話,蔚藍灣畔三座高層A,HouseOasis單位,一千六百五十五呎,呎價逾七千八,創屋苑新高,亦帶挈舊年十月買入單位嘅炒家,賺咗百四萬。
長實要員鬥扮鬼扮馬
長實嘅售樓部要員,除咗要有賣樓呢啲指定專長之外,另外重要有「扮鬼扮馬」嘅專門技能,似乎成為呢間公司嘅文化。
西貢栢濤灣噚日搞直升機活動,老臣子高級營業經理袁添鴻,都跟足長實文化,以飛機師造型登場。一身機師制服,再加埋頂帽,交足功課。
袁添鴻重話,近年轉任營業部,獻出好多個第一次,之前賣元朗四季雅苑,係第一次賣樓,噚日就係第一次扮飛機師,首度為樓盤宣傳坐直升機。
美記員工幻想國際化
唔經唔覺,美記上市接近十年,今個月八號就係十周年,佢哋會搞遊戲活動宣傳,詳情遲啲就知。
內部推廣已經展開,包括搞徵文比賽,題目係由員工幻想吓,公司未來十年嘅發展路向,聽講,唔少希望公司能夠向整個亞洲、甚至歐美等地擴充。
真係唔好睇小一班死撲爛撲搵生意嘅代理,其實潛伏唔少文膽作家,睇吓近排愈嚟愈多代理出書就知。
十年前嘅美記,分行六十二間,員工七百幾人,今時今日,分行激增至四百幾間,員工超過六千人,可謂香港樓市興衰見證。
電郵地址:[email protected]