本欄是勞工處與《蘋果日報》合辦，逢星期四刊出，旨在為勞資雙方解釋有關僱傭問題，如有任何疑問，可致電勞工處熱線：27171771查詢，此熱線由「1823」政府熱線職員接聽。
小玲：喂，你應承過出糧請食嘢喎，你份暑期工都做咗成個幾月，應該出咗糧喇？
明仔：糧就係出咗，不過唔好提嘞，俾老細扣完都無乜得剩。
小玲：點會咁㗎？
明仔：都係我自己唔小心，打爛咗公司兩件值成二千蚊嘅貨，老闆咪喺我今個月份糧度扣番囉。
小玲：唔係喎，我睇勞工處出版嘅《暑期工僱傭條例須知》同《僱傭條例簡明指南》話，《僱傭條例》規定老闆只可以喺特定嘅情況扣員工嘅人工。
扣薪抵償上限三百元
好似員工因疏忽或失職損毀，或遺失僱主嘅貨品或用具，老闆可每次按貨物嘅價值扣除人工，但以不超過300蚊為限，而且，喺咁嘅情況下扣除嘅人工總數，亦唔可以超過員工嗰期糧嘅四分之一。
明仔：但我只係暑期工咋噃，《僱傭條例》保唔保障我㗎？
小玲：《僱傭條例》並無將僱員分為「暑期工」或「非暑期工」，只要暑期工屬於僱員身份，就可以根據《僱傭條例》嘅規定受到保障。不如你去勞工處勞資關係科分區辦事處攞番兩本小冊子，又或者上勞工處嘅網頁下載喇。
明仔：唔……我快啲攞本睇清楚先。
資料提供：勞工處勞資協商促進科
服務熱線
電話：29908288
傳真：23702192
電郵：[email protected]