香港電影界一直有代表勞方嘅九大屬會，包括香港演藝人協會、電影導演會、電影燈光協會同電影美術學會等，呢九大屬會就聯合起嚟組成咗香港電影業總會，負責為業界爭取權益，不過呢啲團體並唔係代表資方說話，所以最近佔咗全香港拍片量八成嘅寰亞電影、中國星、星皓、英皇、東方電影、邵氏、寰宇、美亞同嘉禾九大電影公司組成咗「香港電影出品人總商會」，會長已選出由林建岳擔任。
爭取老闆權益
呢個會嘅會長林建岳會加入埋政府成立嘅電影發展局嘅委員會，咁以後電影發展局入面就會有勞方同資方嘅代表同政府對話，爭取番電影老闆及電影從業員應有嘅權益。呢個電影出品人總商會重會要求加入香港電影金像獎董事局，聽講第一件事就係反對再選文雋做下屆主席。
欣宜瘦身有拖拍
欣宜自從減肥成功後，一直都希望有拖拍，最近終於見到佢身邊出現咗一位猛男林寶麟。呢位後生仔喺溫哥華土生土長，佢同欣宜今年初喺朋友介紹下認識，識咗唔夠一個月就擦出火花，上禮拜六欣宜重帶埋男友參加中學畢業禮派對，佢哋不時拖手仔同跳舞，好鬼親熱，聽講肥姐對呢個男仔印象都幾好。
蔡依林不滿抄襲傳聞
蔡依林（Jolin）噚日喺台北出席唱片慶功宴，對於新歌《睜一隻眼閉一隻眼》俾人投訴話抄襲美國女歌手蓮莎露夏恩嘅歌曲《Rumors》MV，Jolin用國語話：「老被講抄襲我很不開心，明明就沒有的事被講成有，我常看到其他許多藝人的作品也有抄襲的狀況，我只能說這種事層出不窮，只能笑笑看待，做好自己。」
陳光榮告東魅欠款
紅牌唱片監製陳光榮持有嘅公司ClickMusicLimited，指控幫東方魅力音樂有限公司旗下組合EO2進行錄音混音歌曲工作後，重未收到有關服務費用，所以噚日入稟區域法院，向東方魅力追討欠款逾十萬元。入稟狀又指東魅一直拖欠服務費，雖多次發律師信追數，但對方依然拖欠十萬三千五百元。
案件編號：DCCJ2543/05
梁詠琪怕遇矮伴郎
梁詠琪（GiGi）呢排好開心，因為同佢合作多年嘅經理人將會喺呢個月尾結婚，而GiGi重首次做伴娘，重開心過自己出嫁，佢話：「終於打破宿命，因為一直以嚟啲人覺得我好高，冇人搵我做伴娘，為咗佢我會着平底鞋，實行捨命陪君子。但我只係要求個伴郎高過我。到時我會唱歌送畀佢，重想送啲金銀珠寶。」
陳浩民送阿佘燕窩療傷
陳浩民噚日喺西貢拍攝無綫劇集《施公奇案》，提到佢嘅半公開緋聞女友佘詩曼日前拍劇受傷，佢就話嚟緊阿佘要去牙醫度整番兩隻崩咗嘅門牙，𠵱家一定吹唔到口哨。至於佢俾人影到漏夜送魚翅同燕窩去阿佘屋企，佢就話係受公司所託，重話自己只係一個外賣仔。
