近幾個月上落市，唔少二三線股票都由高位大幅回落，實力股PE好多都跌到幾倍水平，而息率又有幾厘。股價低殘，純粹係市場投資氣氛低迷使然，只要投資者信心返番嚟，呢類偏低嘅股份，只要上番合理水平，升幅應該會有20%至30%，而且重可以財息兼收。
今日推介嘅係滙多利（607），去年12月中，股價最高1.23元，近日落到0.90元，跌幅近27%，其後由低位回升，噚日收0.99元，升2仙，往績PE5.7倍，息率5.5厘。05年度（4月年結）的上半年，營業額同盈利都有雙位數增長。
一間年年業績都有穩定增長，而毛利率又高企於40%以上嘅公司，當PE同息率都去到吸引嘅水平，實在揸得過。滙多利的每股盈利，由2000年度的8.2仙，去到04年度的17.2仙，升幅超過1倍。
今年，公司奪得美國通用家電的港澳代理權，盈利又增添新來源。
滙多利主要從事家居電器設計、製造和銷售，雖然原材料價格上升，但由於有90%的零部件都由集團自行製造，大大減低分判承包工序之開支，而公司又推出更多高利潤的產品抵銷成本上漲，05年度的上半年，毛利率雖微降，但仍能企於遠高於同行的43.8%水平。
另外，集團擴建的新廠房已完成，生產力可提升50%。
集團自行研發、毛利率較高的Regent品牌新產品MPEG4便攜式多媒體播放中心（PMP），已推出市場，最新定單來自美國同歐洲，出口價約1800元，而現時市場同類產品售價4000至5000元，極具競爭力，預期現年度可帶來盈利貢獻。
有機與通用加強合作
同通用的協議暫時仍在代理層面，由集團在港澳的150多個銷售網點，分銷逾10種通用的家電產品，唔排除雙方日後會加強合作，通用入股的可能性亦不容抹煞。
05年度，估計集團盈利7000萬元，每股盈利16仙（因年前配售新股攤薄）；06年度，盈利可達9000萬元，每股盈利20.5仙，以PE6倍計，股價已可見1.20元。
郭兆誠