香港地寸金尺土，未儲到第一桶金買樓搬出嚟之前，點都要孖實屋企人一齊住，人人擁有自己一間房，有時間有心思的都會盡量令細小的空間變成心目中的理想天地。今日對版就有五間唔同風格特色嘅睡房，三間少女房兩間大男孩房，房主人各師各法。無論係懷舊物品收集站、放滿HelloKitty公仔精品定係布置得一室少女紅房，梗有一間令你看得羨慕或嘩然。
記者：梁彩燕
攝影：陳盛臣、伍慶泉、何家亮
模特兒：Tina
少女部屋
1.懷舊可樂DIY汽水蓋框
面積：80呎
Winnie十一、二歲已開始鍾意車，人愈大就連懷舊嘢、可樂嘢甚至古靈精怪東西都鍾意收藏。講鍾意好多時只要有Feel就是了，要她講出箇中原因實在考起！收藏生涯已有十幾年的Winnie，坦言飲可樂已經飲到怕怕，也因為房間面積的關係未能展示所有心愛品，近年更要忍手入貨，以免愈放愈多愈亂，雖則如此，Winnie對於可樂十幾年來的熱情（感情）又怎會如此輕易便減退呢！
件件都係心水貨
眾多可樂精品中，要數出最難忘或最喜愛的選擇一點不易，在房內隨手撿來款款都是心水推介，「呢幾個80年代嘅1公升汽水樽已經係絕版，係朋友喺山旮旯地方趁士多執笠撿回來的；幾支小結他擺設係爸爸飲汽水換回來的，造型好Classic好Elegant；呢個可樂櫃內的精品仔，款款都無得買，全部要飲可樂一個個咁換返來，得來不易㗎！」房中重發現好多殘舊嘢或古靈精怪玩意，各式各樣的盞鬼懷舊玩具、嚇人鬼手、不文老人、甚至街燈路牌都有，只要有時間有耐性，房內定有事物叫你駐足細看。
泰國製品夠盞鬼
好多可樂精品都是旅行時買下，近如大陸、東南亞、台灣、日本，遠則墨西哥、澳洲也有。Winnie也頗有心得地分享着：「泰國其實有好多由當地人DIY的可樂擺設或玩意，而且價錢便宜又夠創意，我都買咗幾款，例如掛喺牆頭的木掛牌、成架輪椅咁款的小擺設或棒球棍都係泰國人自製，都好盞鬼㗎！」
小記有Say
Winnie睡房成間大學宿舍咁款，可樂擺設已經將兩邊飾櫃堆得密質質，即使通道兩旁都堆放住各種雜物，但到處都有筒呀掛牆吊飾呀等新奇嘢，每件都有各自的小故事，反而幾有尋寶Feel！
2.2,500吉蒂貓齊齊上雜誌
面積：50呎
打從4歲開始着第一件HelloKitty衫，大表姐就暗裏決定要和HelloKitty發展長久的關係。大表姐多年來備有小本子記錄一切有關購買Kitty的支出和數目，據她極有系統的數字顯示，由1987年起，家裏至今竟有超過2,500幾件HelloKitty物品，數量聽起來也真夠驚人！但如此龐大數量如何把物品收藏？大表姐笑言屋企地方淺窄，如今房內Kitty都已堆得密麻麻插針都難，所以大部份Kitty已搬家到貨倉去了，都咪話唔誇張！
廣告牌作禮
大表姐迷Kitty也薰陶了媽咪，所以每回到HelloKittyLand，和妹妹幾人就更為瘋狂了！最估唔到係大表姐95年年紀輕輕時，已憑住Kitty人氣女生之名，被日本「草莓」雜誌刊登相片，各位可要留心，重係同一間屋㗎！而儲咗咁多年Kitty用品，趣事必定多籮籮，親朋好友都愛大表姐心切，去旅行都幫大表姐影Kitty買Kitty，更有朋友曾在廣州麥記「順手牽Kitty」把廣告牌也帶回來送禮！
1:1最珍貴
要數大表姐認為至矜貴的可謂1:1的HelloKitty公仔，大表姐娓娓道來，「Kitty嘅真身就係有5個蘋果咁高、3個蘋果咁重，公仔按住原裝版本製造，呢個係30周年推出嘅復刻版，重連埋Kitty的Profile介紹，只係300幾蚊港幣。」
小記有Say
知道大表姐重有超大量Kitty嘢存放響貨倉，實在好有衝動到倉庫一遊，並且一開眼界見識見識！而話說採訪前我哋要進行一次大規模嘅拆膠袋同翻櫃桶摷舊嘢大行動，拆到手軟之際，發現除咗Kitty之外，原來重有好多Sanrio公仔精品，重搵到我嘅至愛公仔KEROKEROKEROPPI懷舊玩具㖭！
3.紅噹噹×豹紋×玫瑰
面積：50呎
鍾意紅色的人覺得紅色有朝氣、令人精神、開朗、好夏日，但唔鍾意紅色的卻認為紅色好刺眼、容易令人暴躁不安。Mandy屬於前者，將睡房布置得紅噹噹，重有玫瑰花同豹紋點綴，搞得好有少女Feel，但又帶點野性。但Mandy媽咪卻極力反對，原因不離以上所提到幾點，Mandy卻說：「我覺得紅色好醒神呀！自己鍾意就唔會覺得不安㗎啦！」因為貪紅色靚，點都要堅持到底咁話！
常執房摺衫Keep現狀
Mandy約4年前布置房間，構想到房間的大概模樣一定要紅，於是到處搜羅紅窗簾、紅衣架、紅枕頭被單，但當時唔係到處都有家品店，純紅色用品實在難尋，最終還是要自己動手買布自裁，慢慢一步一步苦心經營，才有今天成果。當中紅窗簾更成為Mandy口中至偉大的作品，「因為要自己周圍行街搵布、度Size，車咗一日完工。」
一步不能登天，起初做不到全紅效果，後來想到加點玫瑰花作點綴，就做得一房如此又迷人又公主的布局。Mandy重笑說為咗維持房間靚現狀，要付出一定的犧牲和努力，為免影響成個Feel，房內唔可以亂放其他顏色衣服，重要成日摺衫執房呢！
小記有Say
好佩服Mandy咁有膽識搞到成間房紅彤彤，自問無咁多閒情搞DIY，一來屋企無衣車，二來唔得閒落深水埗買平布，三來唔識度Size，四來唔太Like豹紋（雖然蠻喜歡玫瑰！），五來六來‥‥‥總之就係佩服Mandy囉！