曾蔭權爵士遞咗「辭職信」，中國尚未「批准」，眼色凌厲之下，各方擦鞋勢力，經已集體小腦條件反射，齊齊力竭聲嘶，爭相抬轎，唔理好醜，最緊要順口，齊齊呼喊擁曾口號嘞！
大腦操控一條鞭法神奇
新界王劉皇發狂讚爵士維護新界利益，所以支持爵士（咦，人哋爵士係天主教徒，好似從未入過新界拜神喎！次次新界佬食盆菜，亦冇曾爵士份，可能佢受過哈佛西式教育，覺得人人插對筷子落盆菜度查找肥豬肉，唔係咁衞生喇！）
初初講緊閉門揀特首嘅民建聯重搞笑，頭號人物譚耀宗竟然改口話曾爵士「愛國愛港」㖭（不過曾蔭權仍然死不悔改，係都攬實個英女皇爵士勳銜，將個汽水蓋晚晚kiss一啖至瞓喎，乜唔係重效忠緊大英帝國咩又？）咁蔡菜子喝令曾蔭權放棄爵士銜，咪豈不是警告無效？既然無效，咁以後就好收聲shutup囉係咪？
至於一度憤怒譴責曾蔭權隻手遮天嘅自由黨田少，更認為曾爵士英明到毋須發表政綱，都值得自由黨支持㖭！
人人表態，個個思想過關，共黨嘅大腦操控一條鞭法，用落「一國兩制」嘅香港，效果真係好神奇喎！土共工商界，加埋邊緣勢力如陳智思嗰浸「泛民聯」，中國未批准「辭職」，自己亦未宣布參選，曾爵士經已穩奪四百選委鐵票，簡直勢如破竹，有一統維港天下之勢。最後豈止坐底七百票，連攞全票都冇問題。
競選經費不如撥生果金
今次曾爵士弄假成真，真係隻手遮天嘞！若然重發表所謂嘅政綱，咪變咗浪費紙張反環保，兼製造官僚程序？不如慳番，將啲競選經費，撥充生果金，派畀維園阿伯吖！
三呼萬歲，肉麻大競賽，嘶喊聲重震耳過啲中國人喺文革嗰陣嗌「祝毛主席萬壽無疆」㖭！
表過態，就要留紀錄，今日奉命攬曾擁權，要化口號為行動，全港市民，要記住呢班人昨日嘅大合唱表演，認住佢哋個樣！
傳真︰2623-9278
電郵︰[email protected]