香港資深記者程翔，今次大鑊，在大陸被指為做間諜，若果罪名成立，可判死刑！
程翔係新加坡《海峽時報》駐中國首席特派員，又做過《文匯報》，係大陸改革開放之後入文匯嘅第一批港大學生，本來有機會做梁錦松、加入金融界，走吓位就億萬身家，點知佢有美資銀行唔入，走去左報做，可見係幾咁「愛國」！
雖然後來因為六四睇唔開（其實呢樣嘢，到咗今日，好多精仔都經已跟隨轉晒軚），不過，冇功都有勞，「祖國」對一個愛國知識分子，又使唔使咁辣？
定係別有內情，例如中方同坡佬最近關係唔係咁好，李顯龍訪問台灣，激到中方紮紮跳，所以捉件坡佬嘅夥計開刀，警告坡佬唔好同台灣行得咁埋？
「境外機構」屬邊一忽
《海峽時報》有新加坡國家政府背景，都話「表示震驚」！程翔有新加坡永久居留權，雖然亦持有英國國民（海外）護照，但人人都知道呢本嘢冇乜力，咁現時就睇吓中方畀唔畀面李光耀兩仔爺囉？
程翔涉嫌同「境外情報機構」竊取「國家機密」，據大陸用語習慣，若然係英美，唔會叫「境外」，而係直接叫「外國」，「境外」多數指近近哋嘅港澳及華人聚居嘅國家及地區，香港同澳門，冇國家地位，又何來情報機構，所以呢個「情報機構」屬於邊一忽，諗吓就知喇！
加埋個職銜，叫做「駐中國首席特派員」咁揚，呢一樣都幾樹大招風！程翔若然好命就做席揚第二，睇吓美中紡織品貿易紛爭有冇得解決，或者判十五年，等布殊下次訪問北京前夕，「保外就醫」都幾大機會！
咁就係上籤！下籤呢？就唔敢講嘞！總之做傳媒，又要入大陸，上得山多，就貴客自理喇！北角蔡菜子喺電台話，同佢係港大同學，認為程翔好「愛國」，咁就啱嘞，愛國都照𡁻？中央對於愛國政黨嘅民建聯，無限信任，無限支持，蔡菜子上去講一聲，中央實會畀面，不如由佢出面成立一個「營救愛國人士程翔大聯盟」，自任主席，一手一腳救人，下次直選，咪有票囉？若然冇料到，咁即是連中央都當班香港愛國老左係透明囉！
爆料熱線：29290000、27860099
報料傳真：26239278
報料電郵：[email protected]