將會喺今個月中上映嘅《蝙蝠俠──俠影之謎》噚晚喺日本東京舉行全球首映，多位主角好似基斯頓比爾（ChristianBale）、姬蒂荷姆絲（KatieHolmes）、渡邊謙同摩根費曼（MorganFreeman）等，個個都盛裝赴會。
一家大細到場支持
《蝙蝠俠——俠影之謎》噚晚喺六本木山嘅Virgin東寶戲院舉行全球首映禮，女主角姬蒂荷姆絲以一身低胸露背嘅打扮到場，受盡在場三千位fans嘅歡迎。
而飾演蝙蝠俠嘅基斯頓比爾，同埋喺今日生日嘅摩根費曼都帶埋家人出席盛會，場面熱鬧，其中受盡男女fans歡迎嘅姬蒂喺紅地氈上見到香港記者時，重好有心咁託記者向香港觀眾問安，認真識做。
魅影闖紅地氈搶鏡
不過喺多位主角到場前，主演《歌聲魅影》嘅英國男星謝拉畢拿（GerardButler），噚晚無端端現身紅地氈做攝石人，佢一到場重不停為fans為簽名、揮手同影相，搞咗成半個鐘，但佢見到一班真正嘅演員到達後，就即時入咗戲院。
另外，噚晚嘅首映有唔少日本明星名人撐場，三位後輩好似高橋克典、坂口憲二同永井大，而漫畫家永井豪、女星上原櫻同女歌手相川七瀨亦有到場，其中爵士女歌手綾戶智繪嘅一身金色蝙蝠俠打扮就最為騎呢。
記者張一明、森林檎東京直擊
