在香港，不時會在街上與一些戴着頭巾、穿着民族服裝的人擦肩而過。那刻會想，我們是「這麼近，那麼遠」。到底他們離開遙遠家鄉，在香港這個黃皮膚社會如何生存？特別是那些小朋友。今天，一對來自巴基斯坦的兄妹，帶我們走入他們的天地。你會發現，你我他，怎分得清楚？
記者：李湘虹
攝影：伍慶泉
鳴謝：智貞小學
Fiona講我：咪又係人！
初時見慈姑，覺得佢樣衰！後來做咗朋友，有次學校表演我要着佢嘅民族衫，返學時好多人睥，重話「八婆過嚟！」我咪話「睥咩睥！」咪又係衫！佢咪又係人！
Candy又講：去佢屋企食巴菜
今年巴基斯坦新年，我哋成班去慈姑屋企，佢媽咪煮咗好多巴基斯坦菜，我覺得唔係咁好食，不過就食咗好多！
我唔可以自己出街
我叫胡美莎，個名係姑媽改㗎，唔知點解，但係都幾鍾意。我今年13歲，6歲時由巴基斯坦嚟香港。初入呢間學校讀書時，日日同同學嘈交。嘈乜？乜都嘈一餐，唔記得囉。
廣東話？我梗識！不過爸爸媽媽就唔識，佢哋講烏爾都語。我哋放學都要去學。
我下年升中啦！要離開呢間學校，呢度要殺校㖭，唔捨得兩個好朋友囉！佢哋係「石冬瓜」同「鍾落海」，花名嚟㗎！講到讀書，我最鍾意中英文，理想係做醫生。
邊個話唔可以食麥記！
我叫胡禮西，14歲，係胡美莎阿哥。初初返學成日俾人笑，因為我唔係中國人囉！不過唔記得啦，𠵱家我都有香港Friend不過都係巴基斯坦Friend多啲。
我哋回教徒唔可以食豬，有人話麥記用豬油唔可以食，我自己問過佢啲員工，話用牛油，所以我一於照食。
我哋唔可以同女仔玩，唔可以提唔可以識，爸爸會話我鹹濕。第日結婚都係爸爸幫我揀老婆。
我最鍾意體育堂，想將來做乜？唔知。
後記
一張張的笑臉，一樣的天真無邪！雖然，他們會找到接受他們的香港小朋友，但也會因不一樣的面孔、不一樣的語言而備受欺負。說到底，我們又有甚麼不一樣？
小童．大同
樂施會剛推出的《小童．大同》，是一本刻劃香港少數族裔兒童世界的書，讓他們透過文字和圖畫去表達他們的生活。$80
有一個老婆婆，路上遇到搶匪，給搶去了錢包。其他人知道了，都大歎：「上帝怎麼沒長眼睛，也不可憐一下這老婆婆！」她卻微笑說：「是人家搶我，不是我要搶人家，這不是值得慶幸嗎？」（互聯網）