根據IFPI資料，去年香港唱片總銷量只得7億元，其中只有5張碟的銷量達3萬張，今時今日能賣數千張就已經叫高銷量！偏偏近年大批80年代老牌歌星搞個唱、出大碟都有好成績，張偉文《唱好女人》賣近白金唱片（5萬張）震撼樂壇，久休復出的小鳳姐演唱會加場一日即清，證明咗邊個得到中年Fans認同，邊個就有運行！
記者：邵超
攝影：何家亮
模特兒：BoBo（Salvador）
Dreaming小鳳靚衫
樂壇青黃不接，前輩歌星紛紛出來救市搞個唱，許冠傑、徐小鳳、葉德嫻、譚詠麟、杜麗莎等搶攻中年人市場，部份更有年輕歌迷力撐。近期城中熱話係活躍於七、八十年代樂壇的小鳳姐，演唱會一日賣清$400及$100門券，加場亦係一樣，偶像派周麗淇更撲咗12張飛孝敬媽咪。退出樂壇多年的小鳳姐，99年才有第一個網頁，網主PaulaCheung竟然是一個後生女，後來集結各方網主，合併成「徐小鳳全球歌友會」（www.paulatsui.com），9大網主中6個香港網主都係二十多歲的後生仔，中學過程都係邊同四大天王派的朋友鬥嘴，兼在搜集資料中度過。
為了一把久違的聲音
全球歌友會9大網主
網主一Alex（26歲）：「鍾意徐小鳳把聲夠磁性、夠特別，形象雍容華貴，細個時覺得好靚好有氣勢。讀書時興四大天王，𠵱家掉番轉興番前輩歌星，自己都好自豪識聽好嘢，證明有麝自然香。」
網主二Paula（20歲+）：「自己是四大天王那輩，現在的歌星連唱歌都未唱得好。好音樂應該唔限年份，唔通聽莫札特就幾百歲咩！𠵱家我哋八成會員都係二十幾歲的後生仔。」
雷頌德：新一代無音樂味蕾
唱片界舊人勝新人，不少人歸因於歌曲質素。但業界亦指電台獨沽一味鼓吹本地創作，令樂壇不夠百花齊放。唔肯播放CoverVersion（改編）的歌，一來歌手少咗Hit歌，二來有競爭先有進步，才可以推高本地創作質素。雷頌德就認為：「前輩歌星有實力，儲落一班歌迷，呢班中年Fans未必識Download，覺得聽音樂就要買黑膠、CD。但新一代後生一接觸就係mp3，上網免費Download又方便，買碟俾人笑！最可惜係佢哋未識分辨靚唔靚聲，無音樂味蕾。」
難忘我們的80年代
張偉文今期賣10萬
近年香港樂壇年輕化，一心諗住搶後生仔錢。但唱片公司計錯數，原來今時今日中年人消費力至係最高。今年52歲的張偉文一直未紅過，加盟環星音樂後推出的大碟（包括個人、演唱會及群星演唱會CD及VCD），已累積逾10萬銷量。「自己同流行歌脫節，目標一定是中年客，寫新歌都要求歌要新，但旋律就要舊、有親切感。公司做宣傳做得好，睇到人口老化原來亦有市場。」
師奶Fans懶上網，又不喜歡上網Download歌仔，真係有心畀錢買靚聲。張偉文說對於他們來講，靚聲唔係表面靚咁簡單，當中更包括懷舊、親切、熟悉的情懷。「許冠傑、徐小鳳佢哋又唔係無錢使，點解會出番嚟？自己都想聽靚歌，歌迷都係一樣諗法，佢哋係技癢出來回應歌迷的需要。」
忽然殺出大陸靚聲王
人人追靚聲，香港唱片業已經夠慘，近年翻唱懷舊金曲的大陸歌手都以靚聲包裝，重要個個係樣貌正常、二十出頭的後生女，陳潔麗的大名你聽過未？她的大碟可以賣３萬張，真係唔聲唔聲就喺香港分一杯羹！好奇想知，去吓唱片舖自己睇吓邊個係陳潔麗、陳果和李爍啦。
