大班召集晚飯，席設山光道馬會。此晚不談政治、時事，只談留學，咁就輕鬆得多。在座人士之中公關Ｐ最巴閉，佢位千金得哈佛獎學金四年，讀書成績一流，畢業後去非洲做義工（此乃真正國際視野），之後到劍橋大學讀博士，今年八月就結婚，兩公婆一齊去劍橋，有女、有女婿如此，唔怪得公關Ｐ成日笑到見牙唔見眼。佢位公子呢？讀完中學，攞咗獎學金入UWC（UnitedWorldCollage）嘅美國學校（香港馬鞍山都有一間UWC，名李寶椿），眨吓眼兩年，今秋入大學咯噃，公關Ｐ話：「好多間學校都收佢，佢自己揀咗入布朗Brown。」
咁啱嘅，左丁山嘅半個徒弟Ｋ，剛剛去咗Brown，參加女兒嘅畢業禮。呢間大學係長春藤名校，喺RhodeIsland（羅德島），學費甚高，一年使費要四萬五千美元以上，如果無獎助學金幫手，都幾難頂。此校著名開放，上星期《國際先驅論壇報》有一篇講美國基督教福音教派為咗滲透長春藤學校，特別派獎學金畀該教派嘅叻仔叻女學生，其中一名入咗布朗，發覺布朗一年之中最大嘅活動就係「女同志派對」，幾乎嚇親。呢位福音派學生話布朗有好多有錢仔女，使錢如倒水，冇乜基督教道德觀念喎，佢特別要喺呢間大學做道德重整派，祝佢好運啦。
食完走出嚟，等𨋢之際，一位長者走埋嚟同大班握手，對大班講：「你係我好尊敬嘅人物。」令大班甚為感動，呢個世界真係細，一位朋友講，呢位長者嘅外孫就係香港游泳冠軍，又係留學美國嘅。成班老友啲仔女都係去美國，叻嘅又固然係，會考成績唔多好嘅又係，究其原因，美國大學制度較靈活，學生在香港會考失手一定讀唔到預料，本港嘅大學與英國大學唔使入咯，只有去美國先至有出路。香港出唔到頭嘅學生，去美國轉兩轉就如脫胎換骨，當然要靠自己努力，但美國制度有彈性，係主要原因。