劉德華、葛優同馮小剛導演合作完《天下無賊》之後，佢哋呢個組合計劃下個月開拍電影《娛樂大家》，部戲係講內地狗仔隊點揭明星私隱，據知馮小剛想搵埋劉嘉玲演出，而部戲可能會係寰亞投資，劇本除咗會搵內地編劇寫之外，聽講會搵彭浩翔寫吓香港狗仔隊嘅情況，等部戲可以拍得比較全面。
題材難賣座
呢輪唔知點解咁多公司拍狗仔隊題材，美國嗰邊就有米路吉遜（MelGibson）製作嘅《狙殺狗仔隊》，九月先喺香港上映，香港呢邊就有梁家輝主演嘅《追蹤眼前人》，不過票房認真麻麻。
馮仁昭問華仔係咪接咗呢部戲，佢話：「之前同馮小剛傾過，但因為個劇本未達到佢要求，所以我未知馮導演係咪真係要開拍呢部戲。」馮仁昭真唔明呢類題材咁難賣座，重會有咁多導演要開拍！
郭羨妮返港做人肉紙板
近日喺北京拍攝劇集《爭霸傳奇》嘅郭羨妮，最近成為一美容儀器嘅代言人，前日佢特別返港，出席噚日喺中環舉行嘅美容儀器記者會。着上吊帶裙嘅郭羨妮容光煥發，大會安排佢做「人肉紙板」，同現場買咗產品嘅顧客合照，郭羨妮話：「我同呢間公司簽約一年，酬勞好好，遲啲我會喺內地出席佢哋嘅活動。」
林建明維園綠化情緒
林建明下個月十五至十七日會喺維園舉行「心情靚晒2005」慈善活動，噚日佢同寇鴻萍、朱潔儀等喺灣仔見傳媒。林建明話到時會將維園變成休閒綠洲區，同場重有醫生為市民免費評估情緒病。
林建明話今次活動雖然有玩具大王蔡志明等朋友幫忙，但亦好傷元氣，相信之後要休息番半年先夠。
那英承認同高峰分手
那英同高峰分手嘅傳聞鬧得熱烘烘，繼日前那英嘅唱片公司高層接受台灣記者採訪時確認消息後，那英日前終於透過好友親口證實已經同高峰分手。據知那英前日同一位圈內好友通電話，那英話：「我和他去年就分開住了。」
