房署扑槌，縮短居屋轉售期限，令所有單位都可以喺自由市場買賣，兩大代理立即夥拍財務機構，為業主提供補地價貸款，等佢哋可以喺自由市場出貨。
不過，啲居屋業主似乎唔領情，中記統計十一個解禁居屋屋苑，發現所有放盤，都屬第二市場，只限賣畀公屋綠表客。
中記話，居屋補地價後，市值普遍較第二市場高三四成，好似放盤最多、有六十個嘅筲箕灣愛蝶灣，喺第二市場只值二千六蚊一呎，自由市場就可以賣到三千五。
呢批屋苑，現有二百一十七個盤，比解禁前多一成三。
中記話，呢批業主，唔少查詢自由市場出售，相信係慢熱，遲啲會開始喺自由市場放盤。
倫志炎失威
資深投資者永倫集團主席倫志炎，喺九七高峯期，以三千三百五十萬，買入跑馬地栢樂苑中層B，守咗八年，終於都要蝕本離場。
單位近三千呎，啱啱嘅成交價係二千五百萬，每呎八千幾，比當年買入價跌咗兩成半，蝕八百五十萬。
倫志炎有「收租王」嘅稱號，早年買入大量柴灣杏花邨單位收租，近年轉戰乙級商廈，比較矚目嘅，有去年中以六千幾萬，買入中環美國銀行中心近九千呎樓面，以及今年初，以一億零六百萬，買入灣仔金鐘大廈八成樓面，平均呎價二千。
商場父親節有禮
每逢大時大節，各大主要商場，都會搞應節優惠活動，六月份其中一個節日係父親節，唔知係咪仔女同媽咪關係好啲，母親節優惠多過父親節。
暫時所見，喺父親節有優惠嘅商場，只得尖沙嘴海港城以及大角嘴奧海城。
海港城重安排「自製手表」創意工作坊，只要捐出五十蚊或以上，畀香港血癌基金，仔女就可以同爸爸一齊造手表，送畀爸爸過節。
柯達山景樓跑得快過頭
香港地海景樓份外矜貴，身價比非海景高得多，但有時都有例外，中記蘇光銓話，北角柯達大廈二期十七樓九室，望山景，四千四呎，由同區租轉買客，以八百三十六萬購入自用，呎價千九，創新高。
不過，睇番三月一宗海景成交，呎價只係一千八百八十，事隔冇耐，山景單位已經貴過海景。
柯達山景貴過海景，可以反映物業搶手，造價升得快，所以蘇光銓都話，好快海景單位就會高番過山景嘞。
𠵱家柯達大廈嘅放盤，唔夠十個。
電郵地址：[email protected]
