前一排話過想在香港參與供電的威華達（622），近期隨着大市淡靜而冇乜表現，但噚日股價突然回勇，最高見過0.95元，收0.94元，升2.17％，最矚目係晏晝有一手3800萬股，每股造0.90元的大手成交。經紀陳話，市場傳聞係一位有實力人士要貨，所以值得留意走勢。
威華達早排最高見過1元，其後大部份時間在0.80至0.90元之間徘徊。隻股除金手指外又有中信等，今次若再添一名大隻佬嘅話，估計又會有一番刺激。
另外，招股時令全城股民哄動的I.T（999），今日公布上市後首個全年業績，江湖傳聞表現正斗，點都會賺超過億元，或會對股價有短線刺激。
受到舖位租金持續上升影響，幾乎所有芬佬都唔睇好本地零售股，曾經受惠於自由行概念大升的零售股皆輾轉回落，I.T.亦唔例外，早排曾經跌穿1.95元的招股價，最低見過1.76元，但隨着業績公布期臨近，I.T股價又重浮水面，昨日冇起跌，收2元。
慕容小初