Twins昨日為一化妝品牌的粉底宣傳，示範炮製梳乎厘，感情穩定的蔡卓妍自言入得廚房、出得廳堂，但緋聞男友鄭中基未有機會一試其廚藝，不過自傳出情變後屢次失言的鍾欣桐，竟嘲笑蔡卓妍是隻豬。
女子組合Twins昨日在銅鑼灣一烹飪中心宣傳BIOTHERM泡沫粉底，成員蔡卓妍（阿Sa）與鍾欣桐（阿嬌）即場炮製法式甜品梳乎厘，硬銷塗粉底效果像梳乎厘一樣輕柔軟滑，雖然兩人因「時間關係」未有將梳乎厘放進焗爐中，只出示大會提供的梳乎厘製成品，但也同場加插她們在蛋上畫臉的小環節。
阿Sa膺最漂亮女星
近日有fans發電郵讚阿Sa與Kenny最襯，阿Sa在內地投票中又被選為全國最漂亮女星第一位，反而阿嬌則慘被網友指她最襯一隻豬，自與方力申傳情變後屢次失言的阿嬌竟望着阿Sa說：「我成日同佢一齊，係咪暗示呀？」阿Sa則說：「我同阿嬌最襯，啲人有時間睇多啲書、做多啲運動，唔好成日做埋啲咁無聊嘅嘢啦，唔回應呢啲問題啦，沒完沒了嘅。豬都好，同十二生肖都襯。」
「最叻整蠔油雞翼」
另一方面，阿Sa與鄭中基感情穩定，她有沒有親自做蛋糕給男友享用呢？她說：「以前都試過整蛋糕畀男朋友食，好成功㖭，喺情人節用士多啤梨砌咗個心形蛋糕，但係喺讀書嘅時間，𠵱家都冇時間整。」未知鄭中基有否嘗過她的手勢？阿Sa笑說：「冇喎，Kenny（關智斌）同阿嬌就有試過。」
阿嬌聞言即說：「我以前喺外地讀書要自己整嘢食，最叻整蠔油雞翼，前排我整咗餐餸畀阿媽食，都有整蠔油雞翼。」阿Sa又搭訕說：「我鍾意整嘢食，最叻係煮薯仔粒炒牛肉粒，因為嗰時爹哋同媽咪離婚，我跟爹哋住，有時要煮餸。」問阿Sa是否入得廚房、出得廳堂，她即說：「梗係啦！」那麼她會否是搶手貨？阿Sa笑說：「見仁見智啦。」
採訪：何永寧 攝影：陳慧安
