煲呔參選，其中一個最具爭議性嘅課題當然係西九龍文娛藝術發展區點收科，八方聽聞由班文化界為中堅嘅西九龍民間評審聯席會議一直被煲呔視為最難搞組織，正式係添煩添亂，而許老爺更私下對人形容佢哋係一條刺，掹咗佢又唔係，唔掹又唔係。
點都好，一日西九未拍板，佢哋都追住煲呔。原來早喺五月十三日，聯席會議已經去信當時嘅署理特首，請佢以有意問鼎特首嘅身份，出席下個月十二日喺牛棚舉行嘅一個西九論壇，同達仔以及金勞詹一齊辯論吓，點知噚日收到由特首辦助理私人秘書嘅回覆，話佢唔方便出席，封信係五月二十五日寄出嘅，即係煲呔辭職之日。聯席會議覺得個日期好奇怪，點解遲唔會遲、早唔會早，於是前日再去信煲呔嘅競選辦公室，再次請佢出席，唔知煲呔最後會唔會改變初衷？
爆料熱線：29290000、27860099
報料傳真：26239278
報料電郵：[email protected]