剛過去一季英超聯興起「四五一」陣式潮，結果愛華頓、保頓就憑呢個單箭頭踢法，攞咗下屆歐冠盃同埋歐洲足協盃參賽資格。不過，英超聯高層就為咗「四五一」傷透腦筋。
強弱分野更明顯
諗頭多多嘅英超聯行政總裁施達摩亞（RichardScudamore）計劃來季聯賽推行一項新方案，球隊作客贏波可以有四分，目的鼓勵踢進攻足球；皆因上季好似維拉、布力般呢類原本唔多用單箭頭陣式球隊，一到作客比賽就擺晒「四五一」陣，務求穩守搶一分、甚至三分，踢法欠積極進取，影響球賽觀賞價值，球迷入座率同電視收視率。
施達摩亞今個星期就會同其他超聯高層開會，商討可行性，睇吓係咪可以為聯賽帶來新賣點。我求大俠翻查近兩季作客賽績，作客贏超過十場嘅都係「三強」球隊；雖然此計劃希望刺激中游隊伍打進攻足球，但當中得益者似乎仍然係「三強」，到時「三強」鼎立更加明顯。
美國買女裝內褲
李察臣送禮定自奉？
隨英格蘭到美國參加友賽嘅新星李察臣畀人影到同迪科入咗買女性內衣褲嘅VICTORIA'SSECRET，出嚟嗰陣重揸住個粉紅色袋仔。以前佢做乜都冇人理，但佢幫西布朗護級，日前又入兩粒幫英軍贏美國二比一，梗受人注意。嗰間舖頭啲嘢幾貴，佢女友真有福。
玩遊戲贏25萬鎊班費
白禮頓躉想買前鋒
英國早排有個遊戲，得獎者可以過吓班主癮，將所得嘅二十五萬鎊（約三百五十四萬港紙）放落自己支持嘅球隊度。結果日前公布，由一個叫貝利嘅白禮頓球迷贏咗，而佢重話想球隊可用呢筆錢買個前鋒，藉以增強攻力，保住個英冠席位。希望白禮頓唔會令佢失望啦！
降班附加賽當前
基拿甸奴傷埋大鑊！
帕爾馬嚟緊十四同十八號會同博洛尼亞打降班附加賽，除咗後衞干天尼同摩菲奧上場聯賽領紅牌，首回合肯定要停賽外，原本因累積黃牌同樣要停賽嘅射手基拿甸奴，日前俾國家隊隊醫「Check」到小腿有傷，已經離隊返番帕爾馬。希望佢可以趕及次回合上陣喇！