唐唐做咗署理特首，看住個檔一頭半個月，真係名副其實嘅看守政府，總之望佢平平安安度過就算數，大動作一定唔會有。
前日佢去馬會捧老友夏佳理場，講咗啲扶貧嘢，點知馮檢基反駁佢左袋入右袋，並冇新錢，唐唐新秘馬上補充，話其實自訂車牌收入同幸運車牌收入係兩條數，唔應該混為一談，更何況，政府冇話過唔會額外撥款畀扶貧工作。
唐唐今日正式主持行會大局，八方同佢數一數，三司十一局唔見咗好多人，老董有病唔撈，煲呔去咗參選，其他李少光去咗南韓見法務部長金昇圭，曾俊華同馬時亨都會出埠，真係買少見少，所以分分鐘好快收工。
唐唐呢個星期活動唔多，聽日去出席港龍二十周年慶祝活動，周五就去中大捧諾貝爾得獎人演講場，都係無傷大雅嘅活動。
爆料熱線：29290000、27860099
報料傳真：26239278
報料電郵：[email protected]