徐熙娣（小S）下個月會同金融界太子爺許雅鈞（Mike）訂婚，一對準新人下個禮拜五重會影結婚相㖭，但佢家姐徐熙媛（大S）就啱啱同男友藍正龍分手。
大S今次甩拖有指係因為新加坡藝人麗鳳介入，藍正龍因同麗鳳合作拍劇《活的像個人樣》而傳緋聞，而藍正龍又成日喺公司租嘅屋過夜，所以就俾人傳佢同麗鳳同居，不過麗鳳經理人鄭東樹就已經幫佢否認咗。
否認未婚懷孕
至於小S同男友認識唔夠一年就趕住訂婚，聽講話係因為佢有咗BB。而小S噚日喺台灣出席「克蘭詩心路寶寶成長計劃公益活動」時，佢話呢排忙緊搞結婚嘅嘢。雖然小S曾經講過話唔介意做未婚媽媽，但對於未婚懷孕嘅傳聞，小S就好嚴肅咁否認。不過馮仁昭就留意到平時着到好惹火嘅小S，噚日着住鬆身衫周圍去，又咁突然宣布訂婚，真係唔怪得人懷疑佢嘅。
王晶《雀聖》內地禁映
王晶噚日喺佐敦接受訪問，佢執導嘅電影《雀聖》因為牽涉賭博，所以內地唔批准上映，王晶話佢從來都冇刻意要求喺內地上映，因為佢一早已經知道內地係好抑制賭博嘅題材。
另外，喺新一批內地導演中，王晶就話比較欣賞陸川同王小帥。
《女人天下》三十三萬人捧場
兩間電視台噚日公布上個禮拜收視，亞視力谷嘅韓劇《女人天下》首周播出嘅平均收視雖然得五點（約三十三萬觀眾人次），最高亦只係得七點（約四十六萬觀眾人次），但喺亞視嚟講都算唔錯！至於亞視台慶嘅平均收視就有八點（約五十二萬觀眾人次），無綫對撼嘅《繼續無敵獎門人》都係跌咗一點，但仍然有三十三點（約二百一十六萬觀眾人次）平均收視。
溫碧霞演戲大過天
溫碧霞最近幫華娛電視節目《夜來女人香》做嘉賓主持，佢話呢個節目主要係探討女人感情同心態，重會請一啲女藝人做嘉賓，好似嚟緊會請李麗珍同余安安。溫碧霞話主持完呢輯節目後，應該唔會再做，因為佢覺得自己比較鍾意演戲，而聽日佢就會同老公去布拉格同米蘭度假。
