陳冠希日前在東京與窪塚洋介演出電影《月光浪子》一場逃獄中槍的鏡頭時，不慎扭傷右腳，即時痛入心扉，導演深作健太擔心他骨折，立刻命人報警將他送院治療，幸而經檢查後證實沒有大礙。 特約記者小池春美東京報道
由《大逃殺》的已故日本著名導演深作欣二的兒子深作健太執導、陳冠希（Edison）、窪塚洋介和黑木美沙主演的電影《月光浪子》，上月底在日本開鏡。戲中Edison飾演一位有繪畫天份的逃犯，其好友窪塚洋介為醫好女友黑木美沙，矢志要做醫生，但Edison逃獄後卻令他倆的生活起了很大變化。日前他們在東京近郊的山區拍攝一場逃獄中槍的鏡頭，Edison不慎扭傷右腳，工作人員大為緊張，報警將他送院。
扭傷右腳
警察醫護速速到場
可是Edison不想影響工作進度，堅持留下拍攝，但他的腳傷愈來愈嚴重，右腳又紅又腫，工作人員只好替他敷冰塊止痛，再用沙布包紮，然後Edison便忍着痛、一拐一拐地繼續拍戲。最後Edison終難忍傷口痛到入心，故未能完成鏡頭，導演見狀即命人報警求助，警察與醫護人員火速到場，用警車將Edison送院治理，幸而院方為他照Ｘ光後，發覺其右腳沒有骨折，醫生替他敷藥後就批准出院。
優良文化
團隊精神值得學習
由於翌日不用開工，Edison可以好好休息一日，他接受治療後表示：「拍戲拗柴，搞到隻腳腫到好似豬蹄。正話因為拍一場跑山戲，嗰場戲拍攝之前試咗十幾次，未正式拍，我已經搞到索氣，到正式拍時就拗柴兼擦傷隻腳，當場痛到我死，導演都好緊張，問我要唔要去醫院，我話唔使住，等拍埋個鏡頭先啦，點知都係痛到頂唔順。其實當時我最怕係斷骨啫，好彩照完Ｘ光，證實冇斷骨咋，休息番幾日就冇事啦。」
首次拍日本電影的Edison，對當地人的工作態度讚不絕口，他說：「兩地拍戲文化真係有好大差別，香港人拍戲時間好趕，唔會有好多時間排戲，但日本人拍戲好重視試戲，一試最少重複十幾次，一定要試到好啱導演個feel先得，重有就係日本人嘅團隊精神好好，佢哋所有人員都會好準時開工，到收工都會等埋一齊，就算有啲人員已經收得工，佢哋都唔會走先。同埋日本人幾講尊卑，大家到場開工後輩一定會先向前輩打招呼，收工亦一樣會咁做，我覺得呢啲團隊精神幾值得香港人學習。」
熱炒T恤
窪塚見貴唔捨得着
問到他與去年在日本墮樓、大難不死的窪塚洋介首次合作感覺如何？他笑說：「佢好好人，拍呢部戲嘅期間，佢精神唔錯，做嘢好專業，我同佢用日語溝通，佢都係一位幾健談嘅演員。我記得第一日開工，我同佢互送禮物，窪塚送咗一件Ｔ恤畀我，而我就送咗一件自己時裝店同猿人合作生產嘅限量版Ｔ恤畀佢，窪塚話上網發現件Ｔ恤已經炒到成三百美金（約港幣二千三百四十元），到𠵱家都唔捨得着。」
