張文慈前晚演出亞視台慶後，談到前男友跟黃卓玲拉埋天窗時，除了祝福他們白頭到老外，又感慨在娛樂圈工作真愛難覓，每次拍拖照片曝光後，戀情便無疾而終，她說時還有點眼濕濕。
張文慈（Pinky）、陳煒、朱慧珊、麥家琪、何守信、李綺雯、舒燕、陳寶轅和饒珮君等，前晚在九龍灣國際展貿中心演出亞視《529真情洋溢台慶夜》。
跳熱舞春光無限
一班亞視藝員施展渾身解數演出，當中以饒珮君、舒燕和陳寶轅大跳拉丁舞的環節最香豔。陳寶轅跟衣着性感的舒燕跳舞時，不乏火辣辣的貼身場面，而舒燕亦有不少踢腿動作，令現場春色無邊。
而Pinky談到舊愛Winche余跟黃卓玲日前拉埋天窗時，她說：「我恭喜佢哋，不過我同佢（Winche）冇正式開始就散咗，𠵱家人哋都結咗婚，我費事影響人哋夫婦嘅感情。我同佢當日俾記者影完相都冇聯絡，我同佢一齊嘅時候，佢一定未識黃卓玲。」
問Pinky認不認識黃卓玲？她說：「我識佢，佢係一個好nice嘅女仔，但我唔想講人哋咁多，驚佢哋唔鍾意，我暫時重未有拖拍，亦冇追求者，個個以為我好多男朋友，我試過俾記者影過兩次相，之後都冇咗。」Pinky說時眼濕濕，似乎很感慨，她說：「呢行好難搵到愛情，兩次都係咁，𠵱家啲人唔敢埋我身，我好感慨，係慨歎自己，我都係普通人，都想拍拖，希望有日可以結婚。」
何守信贏天九翅
此外，何守信和李綺雯等代表綜藝組藝員玩贏遊戲，可跟亞視高層共進價值一萬四千八百元的天九翅餐。
採訪：卓美娟、楊潔雯
攝影：葉君海、陳慧安