房屋署上周四通過，居屋轉讓限制，由五年縮短至兩年，變成所有居屋業主，都可以將單位喺自由市場出售。消息公布後四日，呢批解禁居屋，即有第一宗成交誕生。
單位係有居屋樓王之稱嘅黃竹坑雅濤閣，美記吳家楝話，三座中層山景戶，六百九十呎，成交價二百五十九萬，每呎逾三千七。原業主喺○一年用咗一百三十八萬買入，上個禮拜向政府申請咗補地價，重等緊政府究竟會批出乜嘢價錢。
雖然房署列明，單位業主須於轉讓前補地價，但兩至五年嘅居屋業主，可以喺申請補價後訂立買賣協議，協議要訂明，房署評定嘅補價，要喺協議訂後二十八日內完成，否則就屬違規。
商廈誘人短炒
商廈因造價相對高峯仍低一半，市場認為大落後，所以吸引投資者入市，短炒獲利情況普遍，但係，近期好多買入唔夠半年就轉手嘅成交，賣方原來並唔係存心買嚟短炒嘅。
聽業內人士講，旺角有啲次級商廈，買家買入單位裝修，準備自用，點知未入得伙，已經有客話想買，出價高一成半，最後受唔住誘惑，沽出單位。
雖然話，帳面賺價只係得一成半，唔算好多，但因為摸出唔使畀印花稅，所以扣除費用，相對佢畀嘅首期，分分鐘賺一個開。
呢類「無心插柳」嘅成交，主要都係啲幾百呎到二、三千呎嘅單位。
另外，聽講金鐘力寶中心都有零星呢類成交，賣出嘅係韓資公司。
老記美孚置業
記者工作之一，係報道市場關心嘅資訊，但內容好少涉及同行，今次蘭西報道嘅成交，就同行家有關。
中記梁植霖話，買家係喺電視台工作嘅新聞從業員，今次斥資二百零六萬，購入荔枝角美孚新邨百老滙街一○五號中層D，面積六百八十方呎，呎價三千零二十九，重未決定自住定係收租。
不過，若用嚟放租，估計月租約八九千蚊，回報率四厘六至五厘二。
究竟呢位行家有冇揸住其他物業，梁植霖就話，唔係太清楚，只係知道佢𠵱家同屋企人一齊住。
樓盤資料流料
繼尖沙嘴凱旋門後，其他發展商推出全新樓盤，所提供資訊透明度問題，重係市場關注焦點。
蘭西最近收到讀者來信，話佢攞到嘅將軍澳君傲灣樓盤資料，發現有好大出入，同屬第一座單位平面圖，兩份資料呎數完全唔同，有啲差成幾十呎咁多。
蘭西搵番發展商本售樓書對照，發現中原嘅資料完全啱，但另一份就錯晒。不過，錯嗰份係邊間畀佢，就睇唔到，而讀者嘅電子郵箱又唔通，所以冇辦法進一步求證。蘭西惟有奉勸買家小心啲。
黃建業任深圳政協
從商嘅地產代理，原來對從政都幾有興趣。好似中原董事一姐劉瑛琳，一個多月前當上廣州市政協委員，而上市代理行美聯，主席黃建業就啱啱成為深圳市政協委員，日前到深圳，參加深圳市人大四屆一次會議。
據聞，黃主席以前曾經做咗兩年廣州海珠區政協，今次就好似由分行經理，升咗做區域經理咁，由地區政協升格咗做市政協。
深港兩地交往咁頻繁，唔少港商都好關注兩地嘅營商情況，地產代理行都一樣。今次黃主席擔任深圳市政協，唔知可唔可以促進兩地合作呢？
廣州寫字樓搶手
內地瀰漫壓抑炒樓聲音，但廣州樓市首季仍然造好，仲量聯行報告，因愈來愈多公司擴充或搬遷至廣州，特別係金融及消費品公司最積極，對當地甲級寫字樓需求甚殷。廣州甲級寫字樓租值，首季上升二點八巴仙，去年第四季僅升一點二巴仙。售價則因多座新商廈落成，全季只有一點九巴仙升幅。
豪宅市道方面，需求主要嚟自外籍高級僱員，表現一向穩定，但因首季招租單位增加，全季微升零點二巴仙。買賣市場同樣因供應充裕，升幅得零點六巴仙。
電郵地址：[email protected]
