期指結算日，恒指彈升130點。33隻成份股，只有思捷（330）與利豐（494）逆市下跌。6月期指升136點，高水40點。傳統智慧，期指高水代表好嘢，但傳統智慧錯嘅機會同唔錯嘅機會一樣咁大。高位追入C輪，諗過先，最好企喺度，冇嘢做。要賭，不如做淡嗰邊。
恒指P輪3605：兩日夾埋，恒指升274點。預埋挾淡倉挾多一百幾十點，分段揸恒指P輪。
搏殺格，揀3605，下月尾夠鐘，的確時日無多。輪價5.4仙，溢價0.9%，槓桿率50倍（有效29.6倍），引伸波幅13%。有心理準備，隻輪唔會靜，恒指變動1%，隻輪輕易升跌20%，昨日就已經有咁嘅波幅。所以落場做嘢，注碼要好好控制。賭遠期恒指P輪，揀3942，9月尾夠鐘，輪價變化敏感度低啲。
新地P輪4765：新地（016）升1元，C輪自然意氣風發，P輪自然跌到頭耷耷。高位追C輪，恐怕水位有限。低位撈P輪，值博率較高，對象係最熱門嘅4765，昨跌16%。4765喺10月初夠鐘，輪價26.5仙，溢價3.9%，槓桿率28倍（有效12倍），引伸波幅17.8%，同類輪中成交金額最大係佢。
章盛