同枱飲茶，七人之中有四位港大校友，一位醫生、一位賓架、一位律師、一位投資專家，大家傾偈，傾傾吓就自然講到「香港大學李嘉誠醫學院」之事。咦，三位贊成，一位反對，反對嘅就係醫生。賓架與投資專家話大學籌款，將大學學院（faculty）以捐款人命名，稀鬆平常。投資專家好多年前在「時喜」服務，當年之大老闆就係SandyWeil，呢位先生白手興家，在華爾街打滾數十年，卒之憑購併花旗集團，成為花旗主席，達至高峯。Weil先生捐款畀長春藤名校康奈爾（Cornell），康奈爾嘅醫學院就以Weil夫婦為名，讀起嚟十分長氣。捐咗幾多錢呀？投資專家話：「好似超過一億美元，但一定唔夠十億港紙。」
賓架講：「康奈爾歷史更耐啦，聲譽又好過我哋母校，人哋都冇反對喎。」律師附和此意見，只有醫生繼續嘈，嘈咗一輪，大家聽得出弦外之音，原來佢好唔鍾意港大醫學院幾位元老話事人及呢班元老嘅愛徒楊永強，因此而順帶反對李嘉誠醫學院。計起嚟，此乃私人意見，涉及讀書時代嘅內情，不便在此細說。
香港已經係中國最西化最國際化嘅城市，但好多人嘅思想仍然好傳統，不能接受美國嗰一套大學捐款文化。美國大富豪好多都在生前捐錢畀（一）母校、（二）慈善機構、（三）個人名義基金會、（四）成立特別基金（如愛滋病、心臟病）。中國富豪嘅傳統就係生前捐少少，死後將啲遺產交晒畀子孫。蓋茨與畢菲特都聲言死後唔會留低大量家財畀仔女，一定會捐到盡。中國富豪可唔可以向美國大富豪學習呢？
香港富豪之中，李嘉誠捐得最多，邵逸夫其次，希望佢哋將來重捐多啲，但如果有好多小心眼之人對捐款（大大筆如十億）諸多批評，上綱上線，又話香港大學唔清高，點捐呀？偏偏香港最有錢嗰十位八位都唔係大學畢業生，想對母校有感情都唔得，以後不如捐晒畀牛津劍橋哈佛耶魯啦。