前利物浦領隊侯利亞經過一年休戰後，獲法甲盟主里昂委任為新任教練，我求大俠對呢個消息唔感到突然，不過就有啲擔心佢老人家嘅健康。話晒里昂喺法甲四連霸，球迷期望鬼咁高，真係怕佢心臟負荷唔到喎。
話就話法甲聯賽水準唔及英、意、西、德等地，不過里昂條衞冕路一啲都唔易行；今季「超班」唔等於來季都係，呢個夏天重要抗挖角潮，例如陣中主將艾辛如無意外會蟬過別枝。除咗聯賽之外，侯利亞以前教嘅利物浦今季揚威歐洲，可以想像佢都想喺歐洲舞台威威；咁大壓力，奉勸呢位五十七歲，曾經做過心臟手術嘅名帥保重身體。
講開艾辛，據講皇家馬德里有一個非常有利嘅條件邀佢過檔，就係艾辛原來係碧咸fans。不過咪話我話，其實艾辛踢法有啲似皇馬舊將馬基列尼，兜兜轉轉搞咁多嘢，倒頭嚟都係為搵工兵而費神。
帶住班「工蜂」愈打愈好
巨無霸抵你大口氣
一向口多多嘅奧尼爾，噚日作客贏咗活塞之後又發偉論。話自己係熱火嘅「蜂王」，雖然復出後狀態未夠，但靠一班「工蜂」愈打愈好，都可以打到呢個地步；如果佢有番十成狀態，大家就有好戲睇。睇見「巨無霸」帶住班綠葉球員愈打愈好，又真係唔怪得佢口氣咁大。
投車仔幫畢爾包賺番筆
迪賀奴都算有情有義
車路士講咗好耐話要搵左後衞，終於鎖定收購畢爾包嘅迪賀奴；如果車路士呢個決定早一年落實，可能慳番筆轉會費，事關呢位西班牙國腳，原來去夏已同畢爾包約滿，但為着幫母會搵番筆轉會費，都決定簽多幾年約；𠵱家個結果真係皆大歡喜，亦見到迪賀奴都幾有情義。
國內假波風又起？
范志毅被勒令３停
上海中邦嘅范志毅，日前連同兩名隊友遭受球會停賽、停練、停薪，球會解釋係因為三人未經球會同意，出席珠寶展所致。不過，國內傳聞指「范將軍」被罰原因，同球會高層懷疑有人「打假波」有關。正如亞洲足協秘書長韋立本所講，中國足球唔正視問題，同業餘聯賽無分別。
無辜辜做咗紅牌阿姑
摩菲奧缺陣博洛偷笑
帕爾馬前晚迫和萊切，總算有得打意甲留級附加賽，不過中場摩菲奧同後衞干天尼攞紅牌，附加賽首回合應該冇得打；摩菲奧做紅牌阿姑最無辜，係補時五分鐘佢以為球證吹長雞完場，大腳踢個波上半空，畀球證兩黃一紅趕佢出場，摩菲奧係帕軍中場重心，對手博洛就偷笑。