劉德華與黃秋生私交甚篤，對於老友近來經常批評別人而引起火頭，華仔謂秋生已罵了他十多年，且力撐秋生是很怪的絕頂好人。
劉德華、鄭希怡（Yumiko）及王啟文等前晚到將軍澳電視城演出《勁歌金曲》，華仔以一身白恤衫黑西褲及黑領帶示人，他表示：「我係ManInBlack，因為我要唱Jazz，如果有杯紅酒喺旁邊就更好，不過呢個時段唔可以有酒。」
勸勿做訪問
華仔一向與黃秋生十分老友，提到近日秋生不停批評別人，華仔力撐說：「我覺得佢應該唔好接受訪問一段時間，佢係絕頂好人，不過前面要加個怪字，佢冇心傷害人，佢都鬧咗我十幾年，成日話我唔識唱歌做戲，不過當年冇人大事宣揚，佢𠵱家攞影帝紅咗，抵死。」
華仔表示秋生罵人的風格由始至終都沒變，不過現在較為口沒遮攔，對秋生說過的話不認，華仔則謂：「我唔知，如果佢真係咁就變咗，唔係我當年識嘅秋生，我睇見佢啲報道就心痛，損害晒佢形象。」
秋生日前暗示新城DJ啤梨及范振鋒口齒不清，華仔為他解釋道：「佢讀演藝出身，好執着呢方面，不過流行嘅嘢冇辦法，我自己有時唱歌錄音，監製都叫我發音唔好咁正，唔興喎。」華仔謂他有與秋生通電話，對方頗不開心，他說：「我諗佢最hurt人哋話佢博宣傳，可能佢出發點係好，但表達方式有啲問題。」
被嘲𠝹女歌
此外，Yumiko前晚在《勁歌金曲》演繹新歌《阿拉伯市場》，她打扮成一位阿拉伯女郎，露出小蠻腰，而她日前就為該首新歌拍攝MV，Yumiko笑言：「我被同事笑話我呢首係𠝹女歌，因為今次全部都係女Dancer，我戴住呢啲首飾，成日都𠝹到佢哋，就連我自己都𠝹到花晒。」
採訪：胡比 攝影：陳偉權
