英國著名球星碧咸（DavidBeckham）不嬲都係愛車之人，近日佢又一擲二十四萬英鎊（約三百四十八萬港元），買入兩部被喻為可以媲美占士邦戰車嘅寶馬X5靚車，已經有多部寶馬嘅碧咸今次原來係買嚟接送佢三個寶貝仔。
可防生化襲擊
今次碧咸一買就買兩部寶馬X5，係因為佢保安顧問游說佢咁做。碧咸兩公婆經常咁高調，可能令唔少匪徒虎視眈眈，因為佢個六歲大仔布魯克林（Brooklyn）同兩歲嘅羅密歐（Romeo）時由保母接送出出入入，所以佢特登買兩部超高性能嘅車，確保囝囝嘅安全。
據講碧咸呢兩部車成架都係用鋼做，莫講話子彈，就連一般炸彈都炸唔爛。此外，架車重有獨立氧氣箱，危急時可以供應車內氧氣，防止生化襲擊，而且架車重有防彈車胎，一位車壇中人就話呢架車真係好似占士邦喺電影入面嘅座駕咁犀利。其實能夠保護三位囝囝嘅安全，呢三百五十萬對碧咸嚟講真係抵到極啦。
此外，碧咸噚日以英格蘭國家隊隊長嘅身份，飛抵紐約準備迎戰哥倫比亞，當時碧咸雖然一臉疲態，但仍友善咁同fans簽名。
獲選為靚腿王
另外，美國《InTouch》啱啱舉行咗「最完美身體部份」投票，結果碧咸成為最靚腿部名人，而愛爾蘭男星哥連菲路（ColinFarrell）就獲選最佳屁股。