由○三年開始，JordanBrand每過一排，都會在Jumpman23.com推出「網上限定鞋」給JordanTeamMember獨家訂購。○三年是AJ12黑粉藍、衞衣及帽套裝；今年則是萬眾期待的「雷射」AJ4白紅黑原色、T恤和cap帽。每次搶購，都是一場體驗友情加耐力的戰爭！文：H
回想在三月中，小弟曾在專欄誇下海口，說一定會「班」一套AJ4雷射套裝來香港，誰知入手卻比想像中困難！因為是美國限定，而且每人限買一套，所以十分頭痕；拜託過不少美國波鞋友，點知個個都話自己都要訂，所以幫我唔到，當時十分絕望！
坐足8個鐘始成功
最後關頭，我發現MSN名單上，竟出現一個定居美國的中學同學，簡直如大海明燈，隨即請求他五月十四日留在家中幫我訂鞋，佢好有義氣咁一口答應！代價就係我應承寄好多PSP用品畀佢。
美國時間五月十四號四點幾，Jumpman23.com的Server已大塞車，佢連登入也做不到，（咁大間公司，個server竟然咁……）到成功登入，入信用卡一刻又不能認證要再重新等一次；結果直到十五號凌晨十二點幾，坐足八個鐘先成功訂購，𠵱家好驚佢下次唔幫我。
炒價瞬即逾3千
噚日終於收到個Package，定價二百美金（連稅二百一十六美元，約一千六百八十港元）的套裝，竟然寫住對AJ4建議售價係一百一十美元，T恤同帽各二十八美元；加起都不過係一百六十六元，點解要收多三十四美金？不過家陣喺eBay已經炒到三百幾四百美金，真係瘋狂！
最後要多謝我未婚妻，唔係佢話送畀我，自己都唔捨得買；但佢話要對TiffanyDunkSB，又係一個煩惱的開始……