莫文蔚在台灣金曲獎中頒發「最佳男演唱人」時，讀錯得獎人的姓氏，致王力宏中空寶，此事引起王力宏fans不滿。莫文蔚前晚回應此事時，卻表示自己沒有錯，但會惡補國語。
莫文蔚（Karen）日前擔任台灣金曲獎的頒獎嘉賓，與周杰倫一起頒發「最佳男演唱人」獎，誰知Karen宣讀得獎者是黃立行時，竟將「黃」讀成「王」，令王力宏誤以為自己得獎，遂跑上台領獎，最終卻尷尬下台。事後王力宏fans批評Karen不練好普通話，害偶像出醜，而Karen當晚亦沒有出席慶功便匆匆返港。
歌迷歡呼聲太大
Karen前晚在觀塘出席新歌《眾生緣》MV首播，提到此事時顯得前言不對後語，又稱有份候選「最佳男演唱人」的周杰倫亦緊張得坐立不安，她說：「金曲獎嘅氣氛好緊張，周杰倫有份候選，佢緊張到坐立不安，重話接受唔到壓力，叫我公布，搞到我好緊張，歌迷又尖叫，『黃』同『王』爭少少音，我緊張時講唔清楚囉，加上宣布時歌迷又尖叫，我講完『王』之後大家都聽唔清楚。」
不過Karen及後又否認自己講錯，她說：「歌迷真係太大聲，我發音絕對正確，冇講錯，當時我見到王力宏同黃立行擁抱，重以為佢哋老友互相恭喜。」
自問「唔話得」
至於被王力宏歌迷痛罵，叫她學好國語才去頒獎，Karen聞言尷尬得面色突變，滿臉通紅，她說：「就算係都應該聽埋第三個字，個行字我冇講錯，我明白啲歌迷會替偶像不值，但唔可以怪我啲普通話。我重有兩星期演唱會就開騷，都走去頒獎，冇忘記到台灣市場，好唔話得㗎，我又唔係爭住要讀個名，我覺得我冇錯。」
問Karen不去慶功是否迴避？她說：「我要趕返香港排舞，唔係重要去慶功呀？我都即場向王力宏講咗唔好意思，重全程坐佢旁邊，我會再補習國語，知道啦。」
採訪：魯萍 攝影：何國豪
