時裝界惡女「名牌Q」，睇到上次篇稿提起年輕藝人愛着裏原宿牌子，大表認同。名牌Q雖然一身名牌，但打扮九唔搭八，屬新一代潮人，無人能夠明白。佢成日巡名店，所以有好料相告：「其實我同班Friend早已選出咗娛樂界着死衫四大天王，只要邊件衫着在佢哋身上，嗰件衫就永不超生；嚴重者整個牌子都可被佢哋拖垮。
「四大天王分別係，真係好鍾意唱歌嘅高達K、經常手執結他亮相嘅創作M、熱愛搖頭嘅稻中S，加埋新一代船王游水F。聽講佢哋四個真心仰慕裏原宿設計，不過可能領略有誤，竟可以將件衫逼出第二種風格，連設計師本身亦始料不及，好強呀！有次我親眼見到四大天王之一稻中S，去中環某名店買NumberNine，店員見到佢竟立即將啲衫收埋晒，咁你明點解？據銅鑼灣地舖水貨佬講，如果想件衫跌價，就將件衫送畀佢哋着就可以。本來批衫賣得好哋哋，點知被佢哋是但一個着住見報，銷情立即冷卻。佢哋四個打擊炒風，重叻過報紙講打擊港元炒家嗰個任總呀。」
主持人：大食Jack
八卦熱報：[email protected]