上周5日合計，恒指微跌2點。全周走勢先牛皮，中段急跌，最後急彈。上周五走勢強橫，但總成交只113億元，未能配合升勢，短期展望唔適宜望得太高。高位追C輪驚冇水位，候低買C輪係策略。
長實C輪4797：上周五長實（001）升0.50元，末日C輪3560飛升50%，上周六講過，免得過咪搞末日輪。上周五成交金額最大嘅係3899，收16.2仙，亦大漲18%，隻輪有44球易手，8月尾夠鐘，溢價7.1%，槓桿率43.2倍（有效15.6倍），引伸波幅19.5%。隻輪冇錯爆炸力好勁，但要畀咁嘅溢價，入市最好先諗諗。萬一正股回落些少，而隻輪溢價又縮一縮，好易輸到呱呱叫。
唔想擔驚受怕，可以揀4797，數據實際好多，10月下旬到期，輪價55仙，溢價得3.1%，槓桿率12.7倍（有效8.9倍），引伸波幅19.1%。
中鋁C輪4870：鋁價有反彈迹象，中鋁（2600）上周五升0.10元。搵中鋁C輪短炒，好難揀對象，因為一係溢價唔吸引，一係就冇乜成交。好似隻4870，輪價32仙，明年6月夠鐘，夠長壽，槓桿率12.4倍（實際得4.6倍），引伸波幅又去到38.7%，但要畀30.8%溢價，實在畀唔落手。
睇好中鋁嘅話，買正股好過。
章盛