張燊悅聽日就踏入二十九歲，為咗慶祝佢人生中最後一次二字頭嘅生日，前晚佢特登約埋一位同年同月同日出世嘅好友Catherine，一齊喺中環嘅BohemianLounge舉行生日會，宴請大批好友出席。
前晚生日會以民族feel為主題，好多賓客都着晒各式各樣民族服到場，壽星女着住成套低胸露背民族服，手同腳重戴住大抽飾物，而佢位圈外男友就以阿拉丁造型出現，非常搞鬼。開P期間，有現場樂隊演奏，張燊悅同朋友大唱英文老歌之餘，又不停招呼賓客同影相，結果搞到凌晨三點鐘，壽星女至攞住幾袋禮物，由助手陪同坐的士離場。
韓君婷懶理傳言
噚日張燊悅同馮仁昭話前晚開P好盡興，至於聽日正日牛一就必定同媽咪慶祝，佢重話前晚係咁跳舞，起身後對腳好痠痛，怕且都要去做腳底按摩鬆一鬆。
另外，前晚張燊悅兩位老友黎明同舒淇都因為喺內地開工嚟唔到，但圈中好友鍾鎮濤同倪震等都有出席，韓君婷同陳欣健長女Joanne更懶理同性緋聞，同車嚟同車走，反而過氣情人黃家諾同陳小韻到場同離場都係前後腳。
鄭少秋雲頂跳到索氣
鄭少秋前日喺馬來西亞雲頂舉行《家傳戶曉金曲演唱會》，秋官重將香港近日好受歡迎嘅電視節目《殘酷一叮》搬上舞台，秋官搞笑嘅演出，令在場觀眾捧腹大笑。
不過，秋官喺跳完HipHop舞之後就索晒氣，但佢就話由於雲頂地勢高嘅緣故，所以令到佢缺氧兼氣喘，秋官嘅執生技巧認真厲害，真係薑愈老愈辣。
王啟文簽名會無人吼
因為唱《老鼠愛大米》一曲而為人所認識嘅王啟文噚日去到沙田舉行簽唱會，但係現場就只係得少數市民圍觀睇熱鬧，重冇人排隊攞簽名，工作人員最後更取消咗簽名嘅環節，王啟文唱完四首歌之後就送出咗五隻簽名碟，佢唱片公司嘅負責人就解釋因為佢要趕住入電視城所以取消簽名環節。
黃卓玲不設防等生仔
黃卓玲前晚喺灣仔食晚飯，佢啱啱結咗婚做咗余太，𠵱家已經開始不設防，同老公都希望盡快生番個BB，不過喺造人未成之前，就會盡享二人世界，至於佢老公就因為要斟生意所以𠵱家唔喺香港，黃卓玲重話啱啱接咗一個美容院廣告。
吳宇森、馮德倫無期合作
馮德倫十月原本要開拍《英雄本色》前傳《英雄路》，但噚日馮仁昭同佢通過電話，德倫話：「𠵱家可能唔會用《英雄本色》前傳呢個名，只會叫《英雄路》就算，因為傾版權好麻煩。而我構思想搵吳宇森做監製，之前我同佢喺康城見過面，但吳宇森咁忙，所以唔會幫到呢部戲監製。」
