煲呔曾宣布參選之日，身穿深色西裝，打棗紅色黑圓點煲呔，神采飛揚。呢位超級大熱門一聲宣布參加特首補選，全港要人立即參加大合唱，青年工業家協會刊登全版廣告支持，大孖沙鄭裕彤、何鴻燊等人叫好，連到鄔維庸在刊登廣告反對李嘉誠醫學院之餘，都向記者稱讚煲呔「知難而進」。
香港人素來看風駛𢃇，跟紅頂白乃港人之常情，咁多人擒擒青出嚟表態擁曾挺曾，驚死執輸行頭，是可以理解的，不過一班商人都比較肉麻咯。《明報》（五月二十七日）在Ａ６版刊出一張大相片，好值得攞新聞圖片獎，原因唔係攝記影得好（其實影得唔多靚），而係夠晒新聞觸覺，一張照片勝過下筆千言，道盡人情冷暖，趨炎附勢。呢張圖片題為「齊打煲呔」，內有幾十位「全港各區工商聯會」嘅會董，佢哋舉行第十一屆會董就職典禮，幾十人齊齊穿着深色西裝，打棗紅色煲呔，如果煲呔曾一早知道，參加埋呢個會董就職典禮，咁就蔚為奇觀咯。該會會長陳金霖話：「去年大會以煲呔為指定衣飾，因為煲呔予人較莊重、精神奕奕的感覺，所以今年繼續沿用煲呔。」
既然以後我哋會有一個煲呔特首，你估以後所有商界人物會唔會盡量改打煲呔呢？以後去特首府見領導，係唔係要打煲呔先至合禮儀呀？如果係煲呔曾、勞斯詹、ＢＳ達（借用曹仁超用語）三人競選，唔使講都係煲呔會贏十五個馬位。但即使如此，我哋都唔使學打煲呔來表示擁曾吖嘛？
三年前，霍生大喝一聲：「我挺董」，四方響應，董先生而今安在？賓架陳笑問左丁山：「喂，聽講你識得DonaldJump喎？你問吓佢第日我哋銀行家是否要打煲呔先至順眼啦！」左丁山反問：「DonaldTrump我就知係邊個，DonaldJump是何許人也？」