曾爵士辭職參選，全港市民都笑笑口睇住親中挺董嘅民建聯，點樣實踐「民主建港」！八百人小圈子，睇吓有冇種自己推個人出嚟民主建吓港，定係乖乖哋聽中央主人話，不准添煩添亂，硬性同曾爵士義務抬轎！
由於俾主人喝住，只准挺曾老老實實，不准踩權亂說亂動。老實講，若然八方係民建聯主席及黨羽，心理都會有少少唔平衡，點解自己愛國愛一世，由文革擁毛攬江青，跟住批鄧之後又轉口擁護總設計師，然後保董啜董之後又有辱冇榮，捱到今時今日，冇晒尊嚴，自己不但冇得做特首，連另外提名愛國老左競「選」特首嘅基本政治權利，都慘遭壽爺中央無情剝奪埋。隊冧咗陳方安生，以為有運行，點知眼白白睇住港英餘孽嘅曾爵士踩住自己背脊膊頭坐上位，剩係件衫留低兩個鞋印，乜都冇？
提名邊個「尚未決定」
條氣重係未順，所以北角蔡菜子死撐到底，話民建聯提名邊個做特首，「尚未最後決定」（吓？乜主人決定咗，啲奴僕重未決定咩？）又話曾某係一個「合適人選」，不過，就應該放棄爵士勳銜喎！
身為炎黃子孫，榮獲英國爵士勳銜，全中國十三億人有幾多個吖，好似攞奧斯卡金像獎咁，呢一樣係民族嘅光榮，自己又攞唔到，點解蔡菜子同土共愛國人士係都眼紅睇唔開？
若然唔順，民建聯又敢唔敢一鋪晒冷，喝令曾蔭權在六月十日之前，放棄爵士，否則民建聯就集體杯葛提名曾某，改而提名受到英方政治迫害、有「香港曼德拉」之稱嘅詹培忠？夠唔夠薑？若然唔敢，俾人哋煲呔睇死，咁又嘈乜？爵士精英治港，已成定局，抗拒都冇用，民建聯都係速速埋位，吹啲打、跳忠字舞，齊齊喊嗌祝曾爵士萬壽無疆罷喇！
傳真︰2623-9278
電郵︰[email protected]