彩星集團（635）自從重新推出忍者龜，在美國市場賺大錢，隻股炒咗成大半年，公司在2月份公布的全年業績不負眾望，盈利比起去年勁升2.6倍至2.6億元，當時多間證券行出報告，講到公司前景甚為秀麗，目標價全部喺2元樓上，但股價偏偏不進反退，輾轉回落至最低的1.43元。
經紀黃話，彩星股價下跌，主要有多個原因，首先係市況唔就工業股；二來彩星早排有隻公司輪到期，行使價1.42元較當時市價有大折讓，有投資者沽正股套戥，所以股價偏軟。
不過，彩星公布業績時，又按5送1比例，送多隻新輪畀股東，隻輪行使價2.03元，緊接舊輪到期後在5月24日掛牌買賣，新輪上場後，彩星股價當堂唔同晒，由低位不斷反彈，上周五升5.4％，收1.55元。彩星隻新輪(407)表現更勁，最高見過0.154元，收0.138元，大升25％。
經紀黃話，彩星原本手頭上有2億元現金，計埋舊輪被行使，應可集資多4億元，即係有成6億元現金，公司基本因素冇變，加埋咁強勁嘅財力，睇落相當掂。
慕容小初