行得女人街、花園街，唔係遊客就係師奶！之但係千祈唔好睇小呢兩條街的游擊檔新貨，有創意之餘重識食正潮流條水，「遮陽王」、「花街版PSP」、「負離子牙刷」……聽見個名都覺得騎呢爆笑，而且重係幾廿蚊貨色。年輕人，𠵱家你係咪有一股直踩女人街的衝動呢？
記者：馬慶武
攝影：陳盛臣
Model：Sinling
花街版PSP玩黑白
千祈唔好誤會，呢部花園街熱賣的「GameKing」物體只係個樣勁有PSPFeel啫，畫面功能完會冇得揮！不過勝在價錢平，又夠爆笑。
即Check機迷被「焜」實錄
兩用裝遮陽王
重記得上年勁多人戴、可以冚晒成塊面、扮燒焊工人嗰頂太陽帽嘛？佢的發源地就係旺角女人街喇！今年女人街攤檔又再次為各位怕曬師奶、美白靚女搵嚟一頂名為「遮陽王」的太陽帽。雖然呢個名好似《雄×》、《蘭×坊》呢類刊物咁英偉，但其實佢只係太陽帽同太陽眼鏡的混合體。只要拉低帽上控桿，帽舌下就會伸出防UV太陽眼鏡，唔怕太陽燦眼，難得又有CyberFeel，正！
全家啱着縮骨衫
未上身前，呢件縮骨衫的Size只係比手掌大少少，但竟然可以着上一個成年人身上。皆因縐布質地勁有彈性，一家大細都啱着，畀屋企隻毛公仔着重Cutie！據聞呢件祖國出品縮骨衫已經紅遍大江南北，可見我哋的女人街買手真係幾有「潮流觸覺」！
口靚界+鬼佬熱搶剪紙印
呢隻剪紙印出咗唔夠一個月，唔願出鏡的檔主話佢已經成為今期最多後生仔買的新產品！除咗有心心、星星、花花、動物等圖案，中文字款的圖案就更加成為遊客的手信目標，最勁試過有個外國人一口氣買咗50個返家鄉。
負離子牙刷抄㗎貨
聲稱可去煙迹、防牙周病的負離子牙刷，要入電池先可以使用。「嘩，肯定呃人！」當記者質疑呢把牙刷的功用時，攝影師即時激動：「唔係喎！我用緊喎！不過我真金白銀喺日本買㗎，同呢支個款差唔多！」「咁有冇用呢？」
「……，效果唔係太明顯。」真係信不信由你！
12生肖香味風扇
呢排天氣熱，唔少女人街檔主都話好多人即興買手提風扇仔，當中以呢個系列12生肖風扇最新最特別，可以座枱兼掛頸，重有香味隨風吹送。
女記都有潮貨！
1.搞鬼變身旅行拖
要着的時候翻起扣成人字拖，唔着時就可以放平收入背囊，方便慳位。出埠帶慣私家拖的潮人，踢住去游水露營一啲都唔失禮。
2.Lolita愛死絲帶花
縛手縛頸縛腰都得的絲帶花，最啱Lolita妹用嚟做配飾。另外重可以因應用途扭動絲帶玫瑰花蕊將花朵放大縮細。
3.HipHop頭巾好易笠
縛頭巾出街唔使嘥時間，帽形頭巾後邊有橡筋，笠上頭再戴貨車帽，唔累贅易搞掂！（$15/富華：花園街184號地舖)
女人街指南
